لاہور۔11اکتوبر (اے پی پی):سٹی ٹریفک پولیس نے ای چالان میں سنچری مکمل کرنے والی کار کے ڈرائیور کو 51800 روپے جرمانہ عائد کر دیا ۔ترجمان سٹی ٹریفک پولیس کے مطابق ٹریفک قوانین کی خلاف ورزی پر ہونے والے ای چالان نادہندگان کیخلاف گھیرا تنگ کر دیا گیاہے۔ اس حوالے سے سی ٹی او لاہور عمارہ اطہر نے کہا ہے کہ اب شہریوں کو ٹریفک قوانین کی خلاف ورزی سوچ سمجھ کر کرنا ہوگی،مال روڈپر 108 مرتبہ ٹریفک قوانین کی خلاف ورزی کرنے والی گاڑی کے ڈرائیور کو دھر لیا گیا ہے۔
انہوں نے کہا کہ کار ڈرائیور نے80مرتبہ ٹریفک سگنل،19مرتبہ لین لائن، 9مرتبہ سیٹ بیلٹ کی خلاف ورزی کی۔عمارہ اطہر نے بتایا کہ مال روڈ، جیل روڈ، مین بلیوارڈ گلبرگ، فیروز پور روڈ، وحدت روڈ سمیت اہم شاہراہوں پر ٹیمیں موجودہیں،ای چالان نادہندہ گاڑیوں کے مالکان پولیس سروسز سے مستفید نہیں ہوسکتے،ای چالان نادہندہ ہونے کی صورت میں ڈرائیونگ لائسنس،کریکٹر سرٹیفکیٹ،ویری فیکشن و دیگر 14 سہولیات میسر نہیں ہوں گی۔
انہوں نے کہا کہ سیف سٹی پنجاب اور پولیس خدمت مراکز، ڈرائیونگ لائسنس ایشوینس مینجمنٹ سسٹم کو انٹیگریڈ کردیا گیا ہے،ای چالان سے بچنے کیلئے گاڑیوں کی نمبر پلیٹس سے چھیڑ چھاڑ کرنے والوں کیخلاف بھی کریک ڈاون جاری ہے۔گاڑی کی نمبر پلیٹس پر کالے پیر اور ہندسے غیر واضح کرنے والوں کیخلاف بھی کارروائی کی جائیگی
سی ٹی او نے کہا کہ منظم ٹریفک کیلئے شہریوں کو ٹریفک قوانین کا احترام کرنا ہوگا،کیمروں کی مدد سے ٹریفک لوڈ مینجمنٹ، مانیٹرنگ اور سرویلنس کو یقینی بنایا جارہاہے، بہترین ٹریفک مینجمنٹ کیلئے سیف سٹی سے زیادہ سے زیادہ استفادہ حاصل کیا جارہا ہے۔
Short Link: https://urdu.app.com.pk/urdu/?p=511161
