پشاور۔ 26 مارچ (اے پی پی):سٹی ٹریفک پولیس پشاور نے تجاوزات مافیا کےخلاف کارروائیوں میں 68 افراد گرفتار کرکے مجسٹریٹ کے سامنے پیش کیا جن پر جرمانے عائد کئے جبکہ نو پارکنگ زون کی خلاف ورزیوں پر 28 موٹر سائیکل مالکان کے خلاف کارروائی کی گئی۔ آئی جی پولیس ذوالفقار حمید کے وژن کے مطابق چیف ٹریفک آفیسر ہارون رشید خان کی نگرانی میں سٹی ٹریفک پولیس پشاور کی جانب سے تجاوزات مافیا کو رضا کارانہ طور پر تجاوزات ختم کرنے اور نو پارکنگ زون کی خلاف ورزی نہ کرنے بارے آگاہی کا سلسلہ جاری ہے جبکہ اس سلسلے میں خلاف ورزی کرنیوالوں کے خلاف شہر کے تمام سیکٹرز میں کارروائیاں کی گئی ہیں جس کے تحت تجاوزات قائم کرنے پر 68 افراد کو گرفتار کرکے مجسٹریٹ کے سامنے پیش کیا جن پر جرمانے عائد کئے گئے۔
اسی طرح خوشحال بازار، سرکی گیٹ اور نمک منڈی میں نو پارکنگ زون میں موٹر سائیکلیں کھڑی کرنے پر 28 موٹر سائیکل مالکان کے خلاف کارروائی کی گئی ہے۔ چیف ٹریفک آفیسر ہارون رشید خان نے کہا کہ سٹی ٹریفک پولیس پشاور قانونی تقاضوں کو پورا کرتے ہوئے تجاوزات مافیا کو پہلے نوٹسز جاری کرتی ہے جبکہ اس کے بعد آپریشن کرکے تجاوزات قائم کرنے کے مرتکب افراد کو گرفتار کیا جاتا ہے۔
انہوں نے کہا کہ تجاوزات مافیا شہر کی خوبصورتی کا خاص خیال رکھتے ہوئے اپنے حدود سے تجاوز نہ کریں اور شہریوں کےلئے کسی قسم کی مشکلات پیدا کرنے سے گریز کریں۔ انہوں نے کہا کہ تجاوزات کی وجہ سے شہر کی خوبصورتی متاثر ہوتی ہے جو کسی صورت قابل قبول نہیں۔ چیف ٹریفک آفیسر ہارون رشید خان نے کہا کہ تجاوزات قائم کرنے کے مرتکب افراد کے خلاف قانونی کارروائی کی جائےگی اور کسی کے ساتھ کوئی نرمی نہیں برتی جائےگی۔
انہوں نے کہا کہ شہری نو پارکنگ زون کی خلاف ورزی نہ کریں جس سے ٹریفک نظام میں خلل سمیت شہریوں کو مشکلات کا سامنا کرنا پڑتا ہے جبکہ مرتکب افراد کسی رعایت کے مستحق نہیں ہیں۔ انہوں نے ٹریفک حکام کو ہدایت کی کہ وہ ٹریفک قوانین کی خلاف ورزی کرنےوالوں کےخلاف قانون کے مطابق کارروائی کریں۔
Short Link: https://urdu.app.com.pk/urdu/?p=576296
