اسلام آباد۔21دسمبر (اے پی پی): قومی اسمبلی کے سپیکر راجہ پرویز اشرف اور ڈپٹی سپیکر زاہد اکرم درانی نے بنوں میں کامیاب آپریشن پر سکیورٹی فورسز کو مبارکباد دی ہے۔ بدھ کو قومی اسمبلی سیکرٹریٹ سے جاری بیان کے مطابق سپیکر و ڈپٹی سپیکر قومی اسمبلی نے کہا کہ ہماری مسلح افواج نے دہشتگردوں کے خلاف جنگ میں ہمیشہ سینہ سپر ہو کر کارروائیاں کی ہیں۔ سکیورٹی فورسز کا کامیاب آپریشن ان کی پیشہ ورانہ صلاحیتوں اور دہشتگردی کے خلاف غیر متزلزل عزم کا اظہار ہے۔
کامیاب آپریشن پر سکیورٹی فورسز کی قیادت اور آپریشن میں حصہ لینے والے اہلکاروں کو خراج تحسین پیش کرتے ہیں۔ انہوں نے کہاکہ ملک سے دہشتگردی کے خاتمے کے لیے قوم نے پہلے بھی بڑی قربانیاں دی ہیں۔ دہشتگردی کا قلع قمع کرنے کیلئے قومی اتحاد اور یکجہتی ضروری ہے۔مسلح افواج کی ملکی دفاع اور سلامتی کیلئے دہشتگردی کے خلاف قربانیوں کو ہمیشہ یاد رکھے جائے گا۔
پوری قوم دہشتگردوں کے خلاف کارروائیوں پر اپنی بہادر سکیورٹی فورسز کو سلام پیش کرتے ہیں۔سپیکر راجہ پرویز اشرف نے کہا کہ ہماری افواج دشمن کے ناپاک عزائم کو کبھی بھی کامیاب نہیں ہونے دیں گی۔پاکستان کا دفاع مضبوط اور پیشہ ورانہ افواج کے ہاتھوں میں ہے۔ پوری قوم اپنی مسلح افواج پر فخر کرتی ہے اور ان کے شانہ بشانہ کھڑی ہے۔ سپیکر و ڈپٹی سپیکر نے آپریشن کے دوران شہید ہونے والے اہلکاروں کو خراج ِ عقیدت پیش کیا اوران کے درجات کی بلندی کے لیے دعا کی ۔
سپیکر اور ڈپٹی سپیکر قومی اسمبلی نے زخمی اہلکاروں کی جلد صحت یابی کے لیے بھی دعا کی ۔سپیکر و ڈپٹی سپیکر قومی اسمبلی نے شہید ہونے والے اہلکاروں کے اہلخانہ سے دلی ہمدردی کا اظہار کیا ۔
