سپیکر قومی اسمبلی اسد قیصر کا پارلیمنٹ ہاﺅس میں تقریب سے خطاب

82

اسلام آباد ۔ 4 اکتوبر (اے پی پی) سپیکر قومی اسمبلی اسد قیصر نے کہا ہے کہ مولانا فضل الرحمان کا دھرنا ذاتی بغض اور عناد کے علاوہ کچھ نہیں ہے، کشمیر کی صورتحال کے تناظر میں ملک کو بیرونی خطرات لاحق ہیں، ان حالات میں دھرنے جیسے اقدام کو عوام قبول نہیں کرے گی۔ جمعہ کو پارلیمنٹ ہاﺅس میں عام آدمی کی پارلیمنٹ ہاﺅس تک رسائی کو یقینی بنانے کے لئے استقبالیہ کی افتتاحی تقریب کے موقع پر سپیکر قومی اسمبلی نے کہا کہ پارلیمنٹ ملک کے عوام کا منتخب ادارہ ہے، اس تک عوام کی رسائی یقینی بنانے کے لئے ہم نے عام آدمی گیلری قائم کی ہے، ملک کا کوئی بھی شہری اپنے نادرا شناختی کارڈ کے ساتھ استقبالیہ پر آ کر پاس کے حصول کے لئے درخواست دے سکے گا، نادرا کا عملہ اس کے شناختی کارڈ کی تصدیق کے بعد روزانہ کی بنیاد پر پاس جاری کرے گا۔ انہوں نے کہا کہ ریڈ زون کے اندر عام آدمی کے داخلے کے لئے بھی پارلیمنٹ کا عملہ تعینات کیا جائے گا اور ہر قسم کی سہولیات فراہم کی جائیں گی۔ ایک سوال کے جواب میں انہوں نے کہا کہ کشمیر کے حوالے سے ملک کو بیرونی خطرات لاحق ہیں، ان حالات میں مولانا فضل الرحمان کا دھرنا ذاتی بغض اور عناد کے علاوہ کچھ نہیں ہے۔