اسلام آباد ۔ 13 ستمبر (اے پی پی) سپیکر قومی اسمبلی اسد قیصر کی زیرصدارت جمعہ کو قومی اسمبلی کی ہاؤس بزنس ایڈوائزری کمیٹی کا اجلاس پارلیمنٹ ہاؤس میں منعقد ہوا۔ کمیٹی اجلاس میں قومی اسمبلی کے موجودہ اجلاس کے ایجنڈا اور دورانیہ پر تبادلہ خیال کیا گیا۔ کمیٹی اجلاس میںقومی اسمبلی کے موجودہ اجلاس کو 20 ستمبر تک جاری رکھنے پر اتفاق کیا گیا۔ اجلاس میں وقفہ سوالات ، قانون سازی، عوامی اہمیت کے حامل مسائل سمیت دیگر ملکی اہم امور پر بحث کی جائے گی۔ اجلاس میں علی محمد خان وزیر مملکت برائے پارلیمانی امور، ممبران؛ ملک عامر ڈوگر ، خالد مگسی ، محمد اسلم بھوتانی،اقبال محمد علی، چوہدری محمد برجیس طاہر، خرم دستگیر خان، چوہدری حامد حمید، سید نوید قمر ،سید غلام مصطفی شاہ اورشازیہ مری نے شرکت کی۔
