باکو۔9جولائی (اے پی پی):سپیکر قومی اسمبلی سردار ایاز صادق کی قیادت میں پارلیمانی وفد نے آذربائیجان کے وزیر اعظم علی اسدوف سے باکو میں ملاقات کی۔ بدھ کوقومی اسمبلی سیکرٹریٹ کی جانب سے جاری بیان کے مطابق ملاقات کے دوران سپیکر سردار ایاز صادق نے صدر الہام علیوف اور سپیکر صاحبہ غفارووا سے حالیہ ملاقاتوں کو مثبت اور تعمیری قرار دیا۔ سپیکر سردار ایاز صادق نے ای سی او سربراہی اجلاس کے کامیاب انعقاد پر وزیراعظم آذربائیجان کو مبارکباد دی۔ سپیکرقومی اسمبلی سردار ایاز صادق نے کہا کہ وزیراعظم شہباز شریف کی ای سی او اجلاس میں شرکت دونوں ممالک میں یکجہتی اور خیر سگالی کی علامت ہے۔
انہوں نے مسئلہ کشمیر کے حوالے سے پاکستان کے موقف کی غیر متزلزل حمایت پر آذربائیجان سے اظہارِ تشکر کرتے ہوئے آذربائیجان کی جانب سے پاکستان میں 2 ارب ڈالر کی سرمایہ کاری کے اعلان کا خیر مقدم کیا۔ سپیکر قومی اسمبلی نے دونوں برادر ممالک کی پارلیمانوں میں روابط کو فروغ دینے کی ضرورت پر زور دیتے ہوئے رواں سال ستمبر میں اسلام آباد میں سہ فریقی سپیکرز کانفرنس کی میزبانی کی تجویزپیش کی۔
ملاقات میں آذربائیجان کے وزیر اعظم علی اسدوف نے کشمیر پر آذربائیجان کے اصولی موقف کا اعادہ کیا اورپاکستان کی جانب سے نگورنو کاراباخ تنازعہ پر حمایت پر پاکستان کا شکریہ ادا کیا۔وزیر اعظم علی اسدوف نے کہا کہ آذربائیجان اپنی خودمختاری اور علاقائی سالمیت پر کوئی سمجھوتہ نہیں کرے گا۔ملاقات میں دونوں ممالک کے مابین (پی ٹی اے) ترجیحاتی تجارتی معاہدہ کے نفاذ کا خیر مقدم کیا گیا۔
