اسلام آباد۔18فروری (اے پی پی):سپیکر قومی اسمبلی سردار ایاز صادق نے پاکستان کے دورے پر آئے ہوئے بحرین کے سپیکر احمد بن سلمان المسلم کے اعزاز میں ایک عشائیے کا اہتمام کیا۔ عشائیہ میں پاکستان کی چاروں صوبائی اسمبلیوں اور آزاد جموں و کشمیرقانون ساز اسمبلی اور گلگت بلتستان اسمبلی کے سپیکرز کو مدعو کیا گیا تھا تاہم سپیکر سندھ اسمبلی اور سپیکر بلوچستان اسمبلی اپنی مصروفیات کی وجہ سے عشائیہ میں شرکت نہیں کر سکے۔
عشائیہ میں شرکت کرنے والوں میں سپیکر پنجاب اسمبلی ملک محمد احمد خان ،خیبر پختونخوا اسمبلی کے سپیکر بابر سلیم سواتی، آزاد جموں و کشمیر اسمبلی سپیکر چوہدری لطیف اکبر، گلگت بلتستان اسمبلی کے سپیکر نذیر احمد ، پاک-بحرین فرینڈشپ گروپ کے قائم مقام کنوینئر چوہدری محمد شہباز بابر، اور دیگر معززین شامل تھے۔سپیکر قومی اسمبلی سردار ایاز صادق نے بحرینی وفد کا خیرمقدم کرتے ہوئے عشائیہ میں شریک مہمانوں سے متعارف کرایا۔
انہوں نے اس موقع پر کہا کہ اس ملاقات کا مقصد بحرینی اسپیکر کو پاکستان کے جغرافیائی خدوخال، وسائل، اور پیداواری صلاحیتوں سے روشناس کرانا ہے تاکہ دونوں ممالک کے درمیان تعاون کے مزید مواقع پیدا کیے جا سکیں ۔سپیکر پنجاب اسمبلی ملک احمد خان نے وفد کو بتایا کہ پنجاب پاکستان کا سب سے بڑا زرعی اور معاشی مرکز ہے۔ انہوں نے بحرینی وفد کو مستقبل میں پنجاب کے دورے کی دعوت دیتے ہوئے کہا کہ صوبہ زرعی، صنعتی، اور تجارتی شعبوں میں بحرین کے ساتھ تعاون کو فروغ دینا چاہتا ہے۔
سپیکر خیبر پختونخوا اسمبلی بابر سلیم سواتی نے خیبرپختونخوا کی صوبےکی جغرافیائی اہمیت، ثقافت، معدنی وسائل، تیل اور گیس کے وسیع ذخائر سے وفد کو آگاہ کیا اور انہیں خیبرپختونخوا کا دورہ کی دعوت دی۔سپیکر گلگت بلتستان نذیر احمد نے بتایا کہ گلگت بلتستان قدرتی حسن اور سیاحتی شعبے میں عالمی سطح پر ایک منفرد مقام رکھتا ہے۔ انہوں نے بحرینی وفد کو دعوت دی کہ وہ گلگت بلتستان کے قدرتی حسن دیکھنے کے لیے وہاں کا دورہ کریں۔سپیکر آزاد کشمیر قانون ساز اسمبلی چوہدری لطیف اکبر نے مسئلہ کشمیر پر روشنی ڈالتے ہوئے کہا کہ آزاد کشمیر جغرافیائی لحاظ سے ایک حساس خطہ ہے اور یہاں کے عوام کو پاکستان کی غیر متزلزل حمایت حاصل ہے۔
انہوں نے آزاد کشمیر کی خوبصورت وادیوں اور سیاحتی مقامات کا ذکر کرتے ہوئے بحرینی وفد کو مظفرآباد کے دورے کی دعوت دی۔صوبہ سندھ اور بلوچستان کے اسپیکر کی عدم شرکت کے باعث اسپیکر قومی اسمبلی سردار ایاز صادق نے صوبہ سندھ اور بلوچستان کی نمائندگی کرتے ہوئے بحرینی وفد کو صوبہ سندھ اور بلوچستان کی جغرافیائی اہمیت ، دونوں صوبوں کے ثقافتی ورثے اور موجود قدرتی وسائل کے بارے میں آگاہ کیا۔
انہوں نے کہا کہ بلوچستان قدرتی گیس اور معدنیات کے ذخائر سے مالامال ہے، جبکہ سندھ پاکستان کی صنعتی اور تجارتی سرگرمیوں کا مرکز ہے۔ انہوں نے بحرینی اسپیکر کو آئندہ اپنے دورہ پاکستان کے شیڈول میں سندھ، بلوچستان، پنجاب، خیبرپختونخوا، آزاد کشمیر اور گلگت بلتستان کے دورے کو بھی شامل کرنے کا کہا۔بحرین کے اسپیکر احمد بن سلمان المسلم نے اسپیکر قومی اسمبلی اور تمام شریک اسپیکرز کا پرتپاک استقبال اور مہمان نوازی پر شکریہ ادا کیا۔ انہوں نے کہا کہ انہیں پاکستان میں بے پناہ محبت اور خلوص ملا ہے۔
بحرینی اسپیکر نے پاکستان کو اسلامی دنیا کا ایک اہم ملک قرار دیتے ہوئے دونوں ممالک کے مابین دوستانہ اور برادرانہ تعلقات کو مزید فروغ دینے کی ضرورت پر زور دیا۔ عشائیے کے دوران پاکستان اور بحرین کے درمیان مختلف شعبوں میں تعاون بڑھانے پر تبادلہ خیال کیا گیا اور مستقبل میں اعلیٰ سطح کے وفود کے تبادلوں پر اتفاق کیا گیا۔ اسپیکر قومی اسمبلی سردار ایاز صادق نے بحرینی وفد کا شکریہ ادا کرتے ہوئے امید ظاہر کی کہ بحرین کے پارلیمانی وفد کادورہ دونوں برادر ممالک کے مابین تعلقات کو مزید مستحکم کرنے میں اہم سنگ میل ثابت ہوگا ۔
Short Link: https://urdu.app.com.pk/urdu/?p=563077
