اسلام آباد۔4اپریل (اے پی پی):سپیکر قومی اسمبلی سردار ایاز صادق نے غزہ میں اسرائیلی جارحیت کی شدید مذمت کرتے ہوئے 100 سے زائد بے گناہ فلسطینیوں کی شہادت پر گہرے رنج و غم اور تشویش کا اظہار کیا ہے۔ جمعہ کو اپنے مذمتی بیان میں انہوں نے کہا کہ یہ حملے انسانی حقوق، عالمی قوانین اور جنگ بندی کی کھلی خلاف ورزی ہیں۔سپیکر قومی اسمبلی نے خاص طور پر سکولوں اور شہری آبادی کو نشانہ بنانے کی مذمت کرتے ہوئے کہا کہ ایسے اقدامات انسانیت سوز ہیں اور مہذب دنیا کے ضمیر کو جھنجھوڑنے کے لئے کافی ہونے چاہئیں۔
انہوں نے کہا کہ عالمی برادری کی خاموشی اسرائیل کو نہتے اور معصوم فلسطینیوں پر مظالم ڈھانے کی کھلی چھوٹ دے رہی ہے۔سپیکر سردار ایاز صادق نے اقوام متحدہ سے مطالبہ کیا کہ وہ اپنی سلامتی کونسل کی قراردادوں کے مطابق مسئلہ فلسطین کے منصفانہ اور دیرپا حل کے لئے فوری اور عملی اقدامات کرے تاکہ مشرق وسطیٰ میں پائیدار امن ممکن ہو سکے۔
انہوں نے مزید کہا کہ پاکستان اپنے اصولی مؤقف کے تحت فلسطینی عوام کے حقِ خودارادیت کی بھرپور حمایت کرتا ہے اور 1967 سے قبل کی سرحدوں کے مطابق دارالحکومت القدس الشریف کے ساتھ ایک آزاد فلسطینی ریاست کا قیام ضروری سمجھتا ہے۔سپیکر قومی اسمبلی نے واضح کیا کہ پاکستان کی پارلیمنٹ اور عوام مسئلہ فلسطین کو عالمی، علاقائی اور پارلیمانی فورمز پر اجاگر کرتے رہیں گے اور فلسطینی عوام کے شانہ بشانہ کھڑے رہیں گے۔ سپیکر سردار ایاز صادق نے شہید فلسطینیوں کے لواحقین کے لئے صبر جمیل اور زخمیوں کی جلد صحت یابی کے لئے دعا کی۔
Short Link: https://urdu.app.com.pk/urdu/?p=578500
