راولپنڈی ۔18اپریل (اے پی پی):سکیورٹی فورسزکے خیبر پختونخوا کے ضلع سوات میں آپریشن میں 4 دہشت گرد مارے گئے ۔ آئی ایس پی آر کے مطابق سیکیورٹی فورسز اور قانون نافذ کرنے والے اداروں نے خوارج کی موجودگی کی اطلاع پر ضلع سوات میں انٹیلی جنس پر مبنی مشترکہ آپریشن کیا۔سیکیورٹی اہلکاروں کی خوارج کے ٹھکانے پر مؤثر کارروائی کے نتیجے میں 4 خوارج مارے گئے۔
ہلاک ہونے والے خوارج کے قبضے سے اسلحہ اور گولہ بارود بھی برآمد ہوا، ہلاک خوارج علاقے میں دہشت گردی کی متعدد کارروائیوں میں ملوث تھے۔علاقے میں پائے جانے والے کسی بھی ممکنہ خارجی کے خاتمے کے لیے کلیئرنس آپریشن بھی کیا گیا۔آئی ایس پی آر کا کہنا ہے کہ پاکستان کے قانون نافذ کرنے والے اداروں کے ساتھ مل کر سیکیورٹی فورسز ملک سے دہشت گردی کی لعنت کو ختم کرنے کے لیے پرعزم ہیں۔
Short Link: https://urdu.app.com.pk/urdu/?p=584213
