اسلام آباد۔27ستمبر (اے پی پی):وفاقی وزیر برائے منصوبہ بندی ،ترقی واصلاحات وخصوصی اقدامات پروفیسر احسن اقبال نے کہا ہے کہ سیاحت کے فروغ کے لئے قومی سیاحت کوآرڈینیشن سینٹر قائم کیا جائے گا۔ان خیالات کا اظہار انہوں نے جمعہ کو پاکستان کے پہلے قومی سیاحت ایوارڈز کی تقریب سے خطاب کرتے ہوئے کیا جس میں انہوں نے پاکستان کے سیاحتی شعبے کی بے پناہ صلاحیت اور قومی ترقی میں اس کے اہم کردار پر تفصیلی روشنی ڈالی۔
تقریب ڈسکور پاکستان کے زیرِ اہتمام منعقد ہوئی جس میں سیاحت سے وابستہ اہم شخصیات بشمول ٹور آپریٹرز، صحافیوں، اور لاجسٹکس فراہم کنندگان کی کامیابیوں کا جشن منایا گیا۔ وفاقی وزیر احسن اقبال نے سیاحت کے ساتھ اپنے ذاتی تعلق کا ذکر کرتے ہوئے کہا کہ ان کا یہ تجربہ 1987 میں امریکہ سے شروع ہوا اور سیاحت کو ایک صنعت کے ساتھ ساتھ لوگوں، تہذیبوں اور قوموں کو جوڑنے والے پل کے طور پر پیش کیا۔ انہوں نے سیاحت کی بڑھتی ہوئی اہمیت پر زور دیتے ہوئے کہا کہ یہ تفہیم کو فروغ دیتی ہے، روزگار کے مواقع پیدا کرتی ہے، اور قومی ترقی میں اہم کردار ادا کرتی ہے۔
انہوں نے مزید کہا کہ سیاحت عالمی جی ڈی پی میں تقریباً 10 فیصد حصہ ڈالتی ہے اور دنیا بھر میں ہر دس میں سے ایک فرد کا روزگار اس صنعت سے وابستہ ہے۔ پروفیسر احسن اقبال نے پاکستان کی قدرتی خوبصورتیوں کا ذکر کرتے ہوئے کہا کہ شمالی پہاڑوں سے لے کر چولستان اور بلوچستان کے صحراؤں تک پاکستان کے پاس سیاحت کی بے شمار صلاحیتیں موجود ہیں تاہم غیر مستقل پالیسیوں کی وجہ سے ان وسائل کا مکمل استعمال نہیں ہو سکا۔ انہوں نے یقین دلایا کہ سیاحت وزیراعظم شہباز شریف کے معاشی ایجنڈے کا ایک اہم حصہ ہے، اور حکومت معاشی بحالی کے لئے بھرپور کوششیں کر رہی ہے۔
احسن اقبال نے سابق وزیراعظم نواز شریف کی قیادت میں ہونے والی سکیورٹی اور اقتصادی اصلاحات کی تعریف کی جنہوں نے پاکستان کی عالمی ساکھ بحال کی اور اسے سیاحوں اور سرمایہ کاروں کے لئے ایک پرکشش مقام بنایا۔ انہوں نے یاد دلایا کہ کبھی پاکستان کو دنیا کے خطرناک ترین ممالک میں شمار کیا جاتا تھا مگر 18۔2017 تک یہ ملک سیاحوں کے لئے ایک پسندیدہ منزل بن چکا تھا اور یہ کامیابی سکیورٹی اور اقتصادی استحکام کی بحالی کی وجہ سے ممکن ہوئی۔وفاقی وزیر نے سیاحت کے فروغ کے لئے انفراسٹرکچر کی ترقی پر زور دیتے ہوئے کہا کہ سڑکوں، موٹرویز اور سیاحتی مقامات کی ترقی ضروری ہے۔
انہوں نے قومی سیاحت کوآرڈینیشن سینٹر کے قیام کی تجویز بھی دی تاکہ اٹھارویں ترمیم کے بعد، جب سیاحت صوبوں کو منتقل ہو چکی ہے، اسے قومی اور بین الاقوامی سطح پر مربوط انداز میں منظم کیا جا سکے۔ پروفیسر احسن اقبال نے مذہبی سیاحت کے تناظر میں ملک میں برداشت اور رواداری کے کلچر کو فروغ دینے کی ضرورت پر بھی زور دیا اور کہا کہ ملائیشیا، سعودی عرب اور ترکی نے اپنی ثقافتی اور مذہبی اقدار کو برقرار رکھتے ہوئے کامیاب سیاحتی مقامات کے طور پر اپنی جگہ بنائی ہے۔
آخر میں پروفیسر احسن اقبال نے ایوارڈ جیتنے والوں کو ان کی قابلِ قدر خدمات پر مبارکباد دی اور انہیں حکومت کی مکمل حمایت کا یقین دلایا۔ انہوں نے پاکستان کی سیاحت کے روشن مستقبل پر امید کا اظہار کرتے ہوئے کہا کہ پاکستان ایک بار پھر سیاحوں اور سرمایہ کاروں کے لئے ایک پرکشش اور مثبت مقام کے طور پر اُبھر رہا ہے۔ انہوں نے مشترکہ کوششوں کی ضرورت پر زور دیا تاکہ پاکستان کو ایک عالمی سیاحتی مقام کے طور پر ترقی دی جا سکے جو معیشت میں اربوں روپے کا حصہ ڈال سکے۔
