اسلام آباد۔18جنوری (اے پی پی):وزیراعظم کے معاونِ خصوصی برائے سی ڈی اے امور علی نواز اعوان نے کہا ہے کہ فضل الرحمان مفاد پرست سیاستدان ، سیاسی مافیا پرانے نظام کیلئے جدوجہد کر رہاہے،استعفے منہ پر مارنے کے دعویدار وقت آنے پر بھاگ گئے، نواز شریف کا انجام کرپٹ لوگوں کیلئے عبرت ہے، عوامی خدمت کا سفر جاری رکھیں گے، جلد سوہان تا گلبرگ سروس روڈ کی تعمیر شروع ہوگی۔ وہ گزشتہ روز اسلام آباد کی یونین کونسل 21 میں مختلف ترقیاتی منصوبوں کا سنگ بنیاد رکھنے کی تقریب سے خطاب کر رہے تھے۔ترقیاتی منصوبوں میں سوہان کے مرکزی بازار کی سڑک کی تعمیر و مرمت اور ایک ٹیوب ویل کی تنصیب شامل ہیں۔ اس موقع پر ہونے والے جلسے سے خطاب کرتے ہوئے وزیراعظم کے معاونِ خصوصی برائے امور سی ڈی اے اور رکن قومی اسمبلی علی نواز اعوان نے کہا کہ وہ خدمت کے جذبے سے سیاست میں آئے ہیں جس کی واضح مثال ان کے کروائے گئے کام ہیں- انہوں نے کہا کہ ہم نے اسلام آباد کی تمام یونین کونسلز میں کام شروع کروائے ہیں سوہان سے اقبال ٹان تا گلبرگ سروس روڈ پر کام کا آغاز بہت جلد ہوگا-انہوں نے کہا کہ تجاوزات کے خلاف آپریشن میں جو آئے گا اس کے خلاف کارروائی ہو گی -علی نواز اعوان نے کہا کہ شہر کے ساتھ ساتھ دیہات میں بھی ترقیاتی کام کروا رہے ہیں۔دیہات کے عوام کے لیے اپنے پیاروں کی تدفین کے لئے جگہ نہیں تھی ہم بہارہ کہو میں ان کے لیے قبرستان بنا رہے ہیں۔ انہوں نے اپوزیشن پر تنقید کرتے ہوئے کہا کہ کہ سب اپنے اپنے مفادات کے لئے اکٹھے ہو چکے ہیں ،مولانا فضل الرحمن ہمیشہ اپنے مفاد کی سیاست کرتے ہیں، مریم نواز نے کہا کہ ہم استعفی منہ پر ماریں گے، وقت آنے پر بھاگ گئے،نواز شریف سے کرپٹ لوگو ںکو عبرت حاصل کرنی چاہیے۔ نواز شریف نے چھوٹے سے کام سے بزنس ایمپائرز بنائی، سیاسی مافیا پرانے نظام کے لیے جدوجہد کر رہے ہیں، لیکن پاکستان اب اس سے آگے جا چکا ہے۔ جلسہ عام سے یونین کونسل 21 سے منتخب چئیرمین اور میٹرو پولیٹن کارپوریشن اسلام آباد میں قائد حزب اختلاف ملک عامر کے علاوہ مقامی قیادت نے بھی خطاب کیا قبل ازیں علی نواز اعوان کے جلسہ گاہ پہنچنے پر عوام نے مہمان خصوصی کا استقبال گل پاشی سے کیا۔
