سیالکوٹ۔9اپریل (اے پی پی):محکمہ زراعت سیالکوٹ نے کاشتکاروں کو گھیاکدو کے پودوں کی بروقت چھدرائی کی ہدایت کی ہے ۔ ترجمان محکمہ زراعت نے کاشتکاروں کو مشورہ دیتے ہوئے کہا کہ جب گھیا کدو کے پودے 3 سے 4 پتے نکال لیں تو ان پودوں کا درمیانی فاصلہ مناسب برقرار رکھنے کیلئے 1 جگہ پر1سے زیادہ اگے ہوئے پودوں کو نکال دیا جائے اور چھدرائی میں تاخیر نہ کی جائے کیونکہ تاخیر سے اکھاڑنے پر بچ جانے والے پودے بھی بری طرح متاثر ہو تے ہیں جس سے ان کی بڑھوتری، افزائش نسل و پیداوار پر منفی اثر پڑتا ہے۔
انہوں نے کہاکہ گھیا کدو کی آبپاشی کابھی خاص خیال رکھیں اور پہلا پانی کاشت کے فوراً بعد جبکہ اس کے بعد 1ہفتہ کے وقفہ سے پانی لگاتے رہیں ۔ انہوں نے کہاکہ اگر کسی جگہ پر بارش ہو جائے تو اس صورت میں گھیا کدو کے کھیتوں کو پانی لگانے کا دورانیہ بڑھایا جاسکتا ہے۔ انہوں نے کہاکہ کاشتکار جڑی بوٹیوں کی تلفی کےلئے بھی 3 سے 4 مرتبہ گوڈی کریں اور ہر دوسری چنائی کے بعد گوڈی کرنے سے کھیت نہ صرف جڑی بوٹیوں سے پاک رہے گا بلکہ پیداوار میں بھی اضافہ ہوگا۔ انہوں نے گوڈی کرنے کے بعد پودوں کے گرد مٹی چڑھانے کی بھی ہدایت کی۔
Short Link: https://urdu.app.com.pk/urdu/?p=579872
