سیالکوٹ۔23مئی (اے پی پی):محکمہ زراعت سیالکوٹ نے کماد کے کاشتکاروں کوگرمی کی شدت میں اضافے کے باعث فصل کو بروقت پانی دینے کی ہدایت کی ہے۔ترجمان محکمہ زراعت نے کہا ہےکہ کماد کے کاشتکار گرمی کی شدت میں اضافہ کے باعث کماد کی فصل کو پانی کی کمی نہ آنے دیں کیونکہ مئی کے آخر اورجون و جولائی کے دوران انتہائی موسمی حالات کے پیش نظر پانی کی کمی کی وجہ سے فصل متاثر ہوسکتی ہے۔
انہوں نے کہا کہ کماد کی فصل کو سال میں اوسطاً 16 مرتبہ پانی کی ضرورت ہوتی ہے اور اگر موسمی شدت اور فصل کی ضرورت کے مطابق کماد کی فصل کی آبپاشی کی جائے تو گنے کی فی ایکڑپیداوار میں خاطر خواہ اضافہ ہوتا ہے۔
انہوں نے بتایا کہ جون اور جولائی کے علاوہ مارچ اور اپریل میں 3 ہفتے، مئی تااگست تک ڈیڑھ سے دو ہفتے، ستمبرسے اکتوبر تک فی ہفتہ اور نومبر سے فروری تک 6 سے 7 ہفتے تک پانی دینا بہت ضروری ہے۔ انہوں نے بتایا کہ کھاد ڈالنے کے بعد فصل کو آبپاشی کی زیادہ ضرورت ہوتی ہے تاکہ اس کے بہترین فوائدحاصل کئے جاسکیں۔ انہوں نے کہا کہ برسات کے موسم میں پانی کے تناسب کا خاص خیال رکھنا چاہیے کیونکہ ان ایام میں زیادہ پانی دینے سے گنے کو کیڑا لگنے کا بھی خدشہ رہتا ہے۔
Short Link: https://urdu.app.com.pk/urdu/?p=600621
