سیالکوٹ۔9اپریل (اے پی پی):محکمہ زراعت نے گندم کے کاشتکاروں کو فصل اچھی طرح پکنے کے بعد کٹائی کرنے کی ہدایت کی ہدایت کی ہے۔ اسسٹنٹ ڈائریکٹر محکمہ زراعت (توسیع) سیالکوٹ رانا سلیم شاد نے کاشتکاروں کے نام پیغام میں کہا کہ صوبے کے اکثر مقامات پر وسط اپریل کے بعد سے گندم کی فصل پکنے کی صورت میں کٹائی کا عمل شروع ہونے والا ہے لہٰذا کاشتکار اس موقع پر انتہائی احتیاط سے کام لیں اور فصل اچھی طرح پکنے کے بعد اس کی کٹائی کریں لیکن بارش کے دوران فصل کی کٹائی نہ کی جائے نیز کٹائی کے دوران تسلسل کے ساتھ ریڈیو اور ٹیلی ویژن پر محکمہ موسمیات کی جانب سے کی جانے والی پیشگوئیاں بھی توجہ سے سنی جائیں تاکہ فصل کو نقصان سے بچانا ممکن ہو سکے۔
انہوں نے کہا کہ ابھی اکثر علاقوں میں گندم کی فصل پوری طرح پک کر تیار نہیں ہوئی ہے اس لئے کاشتکار جلد بازی کا مظاہرہ نہ کریں اور فصل کی کٹائی اسی وقت شروع کی جائے جب وہ مکمل طور پر پک کر تیا ر ہو جائے۔ انہوں نے کہا کہ کٹائی کے بعد فصل کو زیادہ دیر تک کھیت میں نہ رکھا جائے نیز ذخیرہ کے لئے گودام کو ہوا دار رکھا جائے جس میں نمی کاتناسب 10فیصد ہو۔انہوں نے کہا کہ اس سلسلہ میں مزید معلومات کے لئے محکمہ زراعت کے فیلڈ سٹاف سے بھی رابطہ کیا جا سکتا ہے۔
Short Link: https://urdu.app.com.pk/urdu/?p=579856
