سیالکوٹ۔ 29 مارچ (اے پی پی):ڈسٹرکٹ ایمرجنسی آفیسر سیالکوٹ انجینئر نوید اقبال نے کہا ہے کہ ریسکیو1122نے عید الفطر کی تعطیلات کے حوالے سے ایمرجنسی کوریج پلان ترتیب دے دیا ہے جس کے مطابق عید تعطیلات کے دوران تمام ریسکیورز کو ہائی الرٹ رہنے کے احکامات جاری کیے گئے ہیں اور ان کی چھٹیاں بھی منسوخ کر دی گئی ہیں۔
ریسکیو میڈیا نمائندہ سیالکوٹ کے مطابق ڈسٹرکٹ ایمرجنسی آفیسر انجینئر نوید اقبال کی سربراہی میں سینٹرل ریسکیو اسٹیشن کچہری روڈ پر اجلاس منعقد ہوا، جس میں ایمرجنسی آفیسر عرفان یعقوب کے علاوہ ریسکیو سیفٹی آفیسرز تحصیل انچارج پسرور محمد عاصم، اسٹیشن انچارج محمد رضا، ضیاء المصطفی، ٹرانسپورٹ انچارج محمد عثمان اور تمام سٹیشن انچارجز نے شرکت کی۔
اجلاس کے دوران عید الفطر کے حوالے سے ایمرجنسی کوریج پلان مرتب کیا گیا۔ سیکٹری ایمرجنسی سروسز ڈاکٹر رضوان نصیر کی خصوصی ہدایت پر ریسکیو1122 تمام اہم مقامات، مساجد و عید گاہوں پر میڈیکل کوریج مہیا کرے گا۔ چاند رات کو بھی ایمرجنسی گاڑیوں کے اہم اور رش والے مقامات پر ریسکیو کی پوائنٹس بنائیں جائیں گے تا کہ کسی بھی ہنگامی صورتحال میں بروقت امدادی کاروائیوں کا آغاز ہو سکے۔ ریسکیو محافظین بھی ڈسٹرکٹ وارڈن جمیل جنجوعہ کی قیادت میں ہائی الرٹ رہیں گئے۔
ڈسٹرکٹ ایمرجنسی آفیسر نے تمام ریسکیورز کی چھٹیاں منسوخ کرتے ہوئے کہا کہ تمام ریسکیورز عید تعطیلات کے دوران کسی بھی ہنگامی صورت حال سے نمٹنے کے لیے ہائی الرٹ رہیں گے۔ مزید براں انہوں نے تمام انچارجز کو ہدایات جاری کرتے ہوئے کہا کے تمام ایمرجنسی گاڑیاں کسی بھی قسم کی ایمرجنسی میں رسپانس کے لیے تیار رہنی چاہئیں اور گاڑیوں کے اندر ادویات وافر مقدار میں موجود ہوں اور اگر کسی بھی قسم کا کوئی بھی مسئلہ درپیش ہو تو تو فورا آگاہ کریں۔
Short Link: https://urdu.app.com.pk/urdu/?p=577253
