اسلام آباد۔27اپریل (اے پی پی):وفاقی وزیر انفارمیشن ٹیکنالوجی و ٹیلی کمیونیکیشن سید امین الحق سے چین کی معروف سافٹ ویئر کمپنی ایزی وے انوویشن کے اعلیٰ سطح وفد نے شی ینگ جُن کی قیادت میں جمعرات کو ان کے دفتر میں ملاقات کی۔وفاقی وزیر آئی ٹی سید امین الحق نے وفد کو اپنے دفتر آمد پر خوش آمدید کہا اور ملاقات میں پاکستان میں سافٹ ویئر ڈویلپمنٹ اورمحکمانہ سطح پر ای آفس و ڈیٹا مینجمنٹ کے حوالے سے تفصیلی گفتگو ہوئی۔
وفاقی وزیر آئی ٹی سید امین الحق نے وفد کو پاکستان میں آپریشن شروع کرنے پر مبارکباد دیتے ہوئے وزارت آئی ٹی کی جانب سے سافٹ ویئر ٹیکنالوجی کے حوالے سے اپنے ہرممکن تعاون کا یقین دلایا۔ انھوں نے کہا کہ پاکستان میں انفارمیشن ٹیکنالوجی میں سرمایہ کاری کے وسیع مواقع میسر ہیں۔ حکومت پاکستان اس ضمن میں غیر ملکی سرمایہ کاروں کو بے پناہ مراعات وسہولیات فراہم کررہی ہے۔
