اسلام آباد۔1ستمبر (اے پی پی):انسانی حقوق، ہم آہنگی و امن کے لئے متحرک معروف این جی او انسٹی ٹیوٹ آف پیس اینڈ ڈیویلپمنٹ انسپاڈ کے صدر سابق مشیر انسانی حقوق ڈاکٹر سردار محمد طاہر تبسم نے کشمیری حریت پسند رہنما سید علی گیلانی شہید کی طویل جدوجہد آزادی اور پاکستان کے ساتھ پختہ نظریاتی وابستگی کو زبردست خراج عقیدت پیش کرتے ہوئے اہل کشمیر سے توقع ظاہر کی ہے کہ وہ ان کے مشن کو آزادی کے حصول تک جاری رکھیں گے۔ وہ یکم ستمبر 2021 کو اپنی رہائش گاہ میں نظربندی کے دوران شہید ہوئے جہاں وہ ایک دہائی سے زائد عرصہ تک مسلسل نظر بند تھے۔
سید علی گیلانی کے یوم شہادت پر ایک بیان میں انہوں نے کہا ہے کہ کشمیر کی جدوجہد اور تکمیل پاکستان کے لئے غازی ملت سردار محمد ابراہیم خان، چوہدری غلام عباس، میرواعظ یوسف شاہ، سردار عبدالقیوم خان، خواجہ عبدالغنی لون اور سید علی گیلانی کی قربانیاں اور خدمات کو کبھی فراموش نہیں کیا جا سکتا وہ بلاشبہ تحریک آزادی کشمیر کے عظیم سرخیل تھے۔ انہوں نے مزید کہا کہ مقبول بٹ شہید، افضل گورو شہید اور برہان وانی شہیدکی لازوال قربانیوں نے تحریک آزادی کو مہمیز دی ہم ان عظیم حریت پسند قائدین کو بھی زبردست خراج عقیدت پیش کرتے ہیں۔
انہوں نے اقوام متحدہ، او آئی سی اور انسانی حقوق کے عالمی اداروں اور تنظیموں سے اپیل کی ہے کہ کشمیری حریت رہنماؤں یاسین ملک، شبیر احمد شاہ، فاروق احمد ڈار، مسرت عالم، آسیہ اندرابی، ظفر اکبر بٹ، انجینئر رشید اور دیگر رہنماؤں اور بلاجواز گرفتار ہزاروں نوجوانوں کی غیر مشروط رہائی کے لئے اپنا کردار ادا کریں اور جیلوں میں قید تمام کشمیری رہنماؤں کو علاج معالجہ کی سہولیات بھی مہیا کی جائیں۔
انہوں نے کہا کہ بھارت نے کشمیریوں کی خصوصی حیثیت کو مذموم منصوبہ کے تحت ختم کر کے کشمیری عوام پر مظالم ، تشدد اور قتل عام میں بہت اضافہ کر دیا ہے۔انہوں نے کہا کہ انسانی حقوق کی سنگین خلاف ورزیوں کا عالمی برادری نوٹس لے اور دنیا بھر میں کام کرنے والی کشمیری تنظیموں اور عوام کو متحد ہو کر بھارت کے غیر قانونی زیر تسلط جموں و کشمیر میں ہونے والے بھارتی مظالم سے آگاہ کرنا چاہئے۔
