اسلام آباد۔31اگست (اے پی پی):سیلاب سے متاثرہ علاقوں میں بجلی کی بحالی پر پاور ڈویژن نے 31 اگست تک کی رپورٹ جاری کردی ہے، مجموعی طور پر 46 گرڈ اور 417 متاثرہ فیڈرز میں سے 159 کو مکمل اور 248 کو عارضی طور پر بحال کر دیا گیا ہے۔
اتوار کووزارتِ توانائی (پاور ڈویژن) کی جانب سے جاری رپورٹ کے مطابق پیسکو کے علاقے سوات، بنر، شانگلہ، صوابی اور ڈی آئی خان کے 12 گرڈز اور 91 فیڈرز متاثر ہوئے، پیسکو کے 84 فیڈرز مکمل اور 7 جزوی طور پر بحال، صوابی اور ڈی آئی خان میں بجلی بحالی کا کام مکمل ہوچکا ہے، سوات، بنر، شانگلہ میں متاثرہ فیڈرز کی مکمل بحالی 2 سے 7 دن تک متوقع ہے۔
رپورٹ کے مطابق گیپکوکے کے 10 گرڈز اور 87 متاثرہ فیڈرز میں سے 73 فیڈرز مکمل اور 13 جزوی طور پر بحال ہوئے، لیسکو میں لاہور، اوکاڑہ، شيخوپورہ، قصور اور ننکانہ کے 58 متاثرہ فیڈرز جزوی طور پر بحال، مکمل بحالی 31 اگست سے 5 ستمبر تک متوقع ہے۔
رپورٹ پاور ڈویژن کے مطابق فیسکو کے زیرِ انتظام علاقوں ٹی ٹی سنگھ، فیصل آباد ، چنیوٹ، جھنگ، سرگودھا، میانوالی اور ڈی آئی خان کے 24 گرڈ اور 68 متاثرہ فیڈرز عارضی طور پر بحال ہوئے، میپکو کے زیرِ انتظام علاقوں میں 100 فیڈرز متاثر، میپکو کے زیرِ انتظام علاقوں میں پانی اترتے ہی متاثرہ فیڈرز کی بحالی کا کام فوری شروع ہو جائے گا۔
ٹیسکو کے علاقے شمالی وزیرستان اور خیبر کے 10 فیڈرز متاثر ہوئے ہیں،ٹیسکو کے 2 فیڈر عارضی طور پر بحال،باقی فیڈرز کی مکمل بحالی 5 ستمبر تک متوقع ہے رپورٹ پاور ڈویژن کے مطابق ہیزیکو کے زیرِ انتظام علاقے مانسہرہ کے 3 متاثرہ فیڈر میں سے 2 مکمل طور پر بحال ہوئے ہیں۔یوں مجموعی طور پر 46 گرڈ اور 417 متاثرہ فیڈرز میں سے 159 کو مکمل اور 248 کو عارضی طور پر بحال کر دیا گیا ہے،متاثرہ علاقوں میں بجلی کی مکمل بحالی ترجیح ہے۔
