سینئر سپرنٹنڈنٹ آف پولیس آپریشنز قاضی علی رضا کا گیارہویں محرم کے جلوسوں کےسکیورٹی انتظامات کا جائزہ

اسلام آباد۔27جون (اے پی پی):اسلام آباد پولیس کے سینئر سپرنٹنڈنٹ (ایس ایس پی) آپریشنز قاضی علی رضا نے ایس ایس پی سکیورٹی/آپریشنز سلیمان ظفر کے ہمراہ ہفتہ کو بری امام اور شاہ اللہ دتہ امام بارگاہوں کا دورہ کیا اور گیارہویں محرم الحرام کے لیے سکیورٹی انتظامات اور جلوس کے راستوں کا جائزہ لیا۔پولیس حکام نے ہفتہ کو اے پی پی کو بتایا کہ ایس ایس پی آپریشنز نے زونل ایس پیز، ایس ایچ اوز اور دیگر پولیس افسران کے ساتھ مل کر جلوس کے راستوں کا معائنہ کیا اور سکیورٹی پلان پر موثر عمل درآمد کو یقینی بنانے کے لیے سیکیورٹی تعیناتیوں کا جائزہ لیا۔

انہوں نے افسران کو ہدایت کی کہ محرم کے جلوسوں اور مجالس کے دوران پوری طرح چوکس رہیں اور تمام منظور شدہ سیکیورٹی اسٹینڈرڈ آپریٹنگ طریقہ کار (SOPs) کی سختی سے تعمیل کو یقینی بنائیں۔ ایس ایس پی قاضی علی رضا نے کہا کہ اسلام آباد پولیس محرم الحرام کے دوران امن و امان برقرار رکھنے اور شہریوں کے جان و مال کے تحفظ کے لیے پوری طرح پرعزم ہے۔انہوں نے کہا کہ مقدس مہینے کے دوران بین المذاہب ہم آہنگی، مذہبی رواداری اور بھائی چارے کے فروغ کے لیے تمام ممکنہ اقدامات کیے جا رہے ہیں۔

ایس ایس پی نے کہا کہ انسپکٹر جنرل آف پولیس (آئی جی پی) اسلام آباد سید علی ناصر رضوی کے ویژن کے مطابق اسلام آباد پولیس محرم الحرام کے دوران پرامن ماحول اور فول پروف سکیورٹی کو یقینی بنائے گی۔ پولیس حکام نے کہا کہ وفاقی دارالحکومت میں 11ویں محرم کے موقع پر سکیورٹی کے جامع اور مربوط انتظامات کو حتمی شکل دے دی گئی ہے، تمام فیلڈ فارمیشنز ہائی الرٹ پر ہیں۔