اسلام آباد۔15اگست (اے پی پی):انسٹی ٹیوٹ آف اسٹریٹجک اسٹڈیز میں سینٹر فار افغانستان، مڈل ایسٹ اینڈ افریقہ کے زیر اہتمام”افغانستان میں عبوری حکومت کے دو سال مکمل” کے عنوان سے ایک ویبینار کا انعقاد کیا گیا ۔ ویبنار کی نظامت ڈائریکٹر سینٹر فار افغانستان، مڈل ایسٹ اینڈ افریقہ آمنہ خان نے کی۔ ویبینار کے مقررین میں ڈائریکٹر جنرل آئی ایس ایس آئی سفیر سہیل محمود، ناظم الامور/ منسٹر کونسلر، امارت اسلامیہ افغانستان سردار احمد شکیب، سابق افغان وزیر کان کنی اور پیٹرولیم نرگس نہان اور سابق پاکستانی سفیر ایاز وزیر، ہیڈ آف آفس، یو این اے ایم اے رابطہ دفتر، اسلام آبادڈاکٹر مالک سیسے، غیر مقیم سینئر فیلو اٹلانٹک کونسل سفیر عمر صمد اور کوئنسی انسٹی ٹیوٹ فار ریسپانسبل سٹیٹ کرافٹ کے ریسرچ فیلوایڈم وائنسٹائن شامل تھے۔
اختتامی کلمات چیئرمین آئی ایس ایس آئی سفیر خالد محمود نے کہے۔ سفیر سہیل محمود نے کہا کہ کابل کے سقوط اور عبوری افغان حکومت کے قیام کے بعد دو سال مکمل ہونے کا جائزہ لینے کے لیے یہ ایک اہم موڑ ہے۔ انہوں نے متعدد غیر متوقع پیش رفتوں کا حوالہ دیا جن میں امریکی/نیٹو فوجیوں کے حتمی انخلاء کی مختصر ٹائم لائن، طالبان کی پیش قدمی اور اس وقت کے افغانستان کے صدر کی اچانک رخصتی، چھ پڑوسی ممالک کے پلیٹ فارم کے قیام کے ذریعے ایک انسانی بحران کو روکنے اور افغانستان کے پڑوسیوں کے ساتھ علاقائی ردعمل تیار کرنے کے لیے بین الاقوامی حمایت کو متحرک کرنے میں پاکستان کا کردار شامل ہیں۔
انہوں نے کہا کہ انسانی امداد کے علاوہ، افغانستان کے مالیاتی اثاثوں کو غیر منجمد کرنا افغانستان میں پائیدار معیشت کی تعمیر کے لیے اہم ہے۔ انہوں نے مزید کہا کہ جامع طرز حکمرانی اور لڑکیوں کی تعلیم اور خواتین کے حقوق سے متعلق چیلنجز کا سامنا ہے، جبکہ پاکستان کو نشانہ بنانے والی دہشت گرد تنظیمیں بھی باعث تشویش ہیں جس کے لیے عبوری افغان حکام کو ٹھوس اقدامات کی ضرورت ہے۔ انہوں نے زور دے کر کہا کہ ایک پرامن، مستحکم اور خوشحال افغانستان پاکستان کے مفاد میں ہے، جبکہ علاقائی اقتصادی انضمام اور سی پیک سمیت باہمی روابط سے سب کو فائدہ ہوگا۔ موجودہ چیلنجوں اور مواقع کے تناظر میں انہوں نے تمام فریقین پر محتاط ردعمل، تعمیری مشغولیت اور بامقصد نتائج کو یقینی بنانے کی ضرورت زور دیا۔ اس موقع پر آمنہ خان نے کہا کہ ابتدائی طور پر طالبان کی اقتدار میں واپسی کے حوالے سے وضاحت کا فقدان تھا، لیکن گزشتہ دو سالوں نے طالبان کے نقطہ نظر کے بارے میں اہم بصیرت فراہم کی ہے جسے آمرانہ پالیسیوں اور عملیت پسندی کا امتزاج قرار دیا جا سکتا ہے۔
طالبان کے گورننس ڈھانچے میں خامیوں کے باوجود انہوں نے استحکام اور سلامتی کی کچھ جھلکیاں حاصل کیں، معیشت کے حوالے سے واضح عملیت پسندی، بدعنوانی پر قابو پایا اور پوست کی کاشت میں کمی کی۔ تاہم سیاسی اور سماجی ہم آہنگی، بنیادی انسانی حقوق سے انکار اور خواتین کے خلاف امتیازی سلوک، انسانی بحران اور دہشت گرد گروہوں کی موجودگی کے حوالے سے بڑے خدشات بدستور برقرار ہیں۔ انہوں نے کہا کہ ماضی کی غلطیوں سے سیکھنا بہت ضروری ہے کیونکہ یہ تمام افغانوں کے لیے متحد ہونے اور ایک ایسے سیاسی نظام پر توجہ مرکوز کرنے کا نادر موقع ہے جو جامع، جوابدہ اور افغان عوام کی خدمت کرتا ہو۔ سردار احمد شکیب نے افغانستان کی سلامتی اور معیشت میں عبوری حکومت کی کامیابیوں پر روشنی ڈالی۔ انہوں نے پوست کی پیداوار میں نمایاں 90 فیصد کمی کا حوالہ دیا اور منشیات کے عادی افراد کی بحالی کے حوالے سے کی جانے والی کوششوں پر روشنی ڈالی۔
انہوں نے کہا کہ اقتصادی کامیابیوں میں غذائی عدم تحفظ اور غربت کا مقابلہ کرنا، مہنگائی کو 18 فیصد سے کم کر کے 9 فیصد تک لانا اور امریکی ڈالر کے مقابلے میں افغان کرنسی کو مضبوط کرنا شامل ہے۔ انہوں نے کہا کہ موجودہ حکومت اور مختلف ممالک اور بین الاقوامی تنظیموں کے نمائندوں کے درمیان فعال مشغولیت اور اعلیٰ سطحی ملاقاتیں ہوئی ہیں۔ نرگس نہان نے ایک جامع طرزحکومت، خواتین کے حقوق، اور اقلیتوں کے حقوق کے تحفظ کی اہمیت پر زور دیا۔ سفیر ایاز وزیر نے افغانستان میں موجودہ امن کی صورتحال کا اعتراف کیا لیکن انسانی حقوق کی خلاف ورزیوں اور خواتین کی تعلیم پر تشویش کا اظہار کیا۔ انہوں نے تجویز پیش کی کہ مذہبی اصولوں پر مبنی مخلوط تعلیم کے معاملے کو مؤثر طریقے سے حل کرنے کے لیے ایک فریم ورک قائم کیا جائے۔ انہوں نے افغانستان اور پاکستان کے درمیان اعتماد سازی پر بھی زور دیا۔
انہوں نے یہ بھی کہا کہ افغانستان میں پاکستان کی ترجیحات میں ایسے فیصلے کرنے کی ضرورت ہے جو کسی دوسرے ملک کے ماڈل یا خواہشات کے مطابق ہونے کے بجائے اس کے اپنے مفادات کے لیے ہوں۔ ڈاکٹر مالک سیزے نے طالبان کی سلامتی کی کوششوں، علاقائی جنگجوؤں کے اثر و رسوخ کو روکنے اور مقامی سلامتی کو فروغ دینے کے ساتھ افغانستان کے بدلتے ہوئے منظر نامے پر روشنی ڈالی۔ اقوام متحدہ اور امریکی پابندیوں کے باوجود، انہوں نے سفارتی اور اقتصادی تعاون کے ذریعے چین کے بڑھتے ہوئے اثر و رسوخ کو بھی تسلیم کیا۔ انہوں نے لڑکیوں کی تعلیم اور خواتین کی ملازمت کی صورتحال کو اجاگر کیا۔ سفیر عمر صمد نے کہا کہ یہ موڑ افغانستان کی تاریخ میں انتہائی اہم ہے، معاشرے کے تمام طبقات پر مشتمل مشترکہ بیانیہ ضروری ہے جس میں سلامتی، استحکام، انسداد دہشت گردی، خواتین کی تعلیم اور معاشی ترقی شامل ہے۔
ایڈم وائنسٹائن نے اپنے خیالات کا اظہار کرتے ہوئے کہا کہ ہمیں مزید پائیدار حل کے لیے کام کرنے کی ضرورت ہے۔ طالبان کی کچھ کامیابیوں پر روشنی ڈالتے ہوئے انہوں نے کہا کہ طالبان نے معیشت اور بنیادی ڈھانچے کی ترقی کا انتظام کیا ہے۔ تاہم لڑکیوں کی تعلیم پر پابندی اور کام کی جگہوں پر ان کی موجودگی پر پابندیوں نے افغان خواتین کو مزید تنہائی میں ڈال دیا ہے۔ ان کا مزید کہنا تھا کہ طالبان کے ساتھ سفارت کاری ہی آگے بڑھنے کا واحد راستہ ہے اور یہ کہ طالبان کو یہ موقع ضائع نہیں کرنا چاہیے۔
سوال و جواب کے سیشن کے دوران سیکورٹی، انسداد دہشت گردی، شناخت، افغان باشندوں کے کردار، مزاحمتی محاذ کی نوعیت اور علاقائی اور بین الاقوامی سفارت کاری کے امور پر تبصرے کیے گئے۔ سفیر خالد محمود نے افغانستان کی صورتحال پر بات کرتے ہوئے کامیابیوں کو اجاگر کیا اور اس کے ساتھ ساتھ انسانی حقوق، دہشت گردی اور شمولیتی سیاست پر بین الاقوامی خدشات کو تسلیم کرتے ہوئے تعمیری بات چیت پر زور دیا۔
