اسلام آباد۔3جنوری (اے پی پی):سینیٹ کی قائمہ کمیٹی برائے وفاقی تعلیم و پیشہ ورانہ تربیت نے وفاقی اردو یونیورسٹی کی انتظامیہ کو طلباء اور حاضر و ریٹائرڈ ملازمین کو درپیش مسائل کو فوری طور پر حل کرنے کی ہدایت کی ہے۔
جمعہ کو قائمہ کمیٹی کا جلاس سینیٹر بشریٰ انجم بٹ کی زیر صدارت ہوا۔ 25 اکتوبر کو سینیٹ میں سینیٹر سید مسرور احسن کی طرف سے وفاقی اردو یونیورسٹی میں جاری ہڑتال کے حوالے سے اٹھائے گئے عوامی اہمیت کے نکتہ کے جواب میں سینیٹر احسن نے اس بات پر زور دیا کہ یونیورسٹی میں طلباء، کارکنوں اور ریٹائرڈ ملازمین کو درپیش مسائل بدستور موجود ہیں جو کہ حل طلب ہیں اور ان پر فوری توجہ کی ضرورت ہے۔
انہوں نے مزید کہا کہ ان کو پنشن نہیں مل رہی ہے اور مکان کے کرائے کی ادائیگیوں میں تاخیر ہوئی ہے، یہ افراد اپنے جائز تحفظات کا اظہار کرنے کے لیے آگے آئے ہیں۔ سینیٹر احسن نے کہا کہ بابائے اردو کے نام سے منسوب یونیورسٹی اہم اہمیت کی حامل ہے، اس کے فیکلٹی اور عملے کو متاثر کرنے والے مستقل مسائل کے حل کو یقینی بنانے کی ضروری ہے۔
کمیٹی کو اردو یونیورسٹی کے ایک پروفیسر نے بتایا کہ ریٹائرڈ ملازمین کو 2017 سے ان کی پنشن نہیں ملی ہے۔ سینیٹ کمیٹی نے سندھ حکومت کی جانب سے اعلیٰ تعلیم کے لیے 32 ارب روپے سے زائد مختص کرنے کو سراہا۔ سینیٹر بشریٰ انجم بٹ نے بار بار آنے والے مسائل کو حل کرنے کی ضرورت پر زور دیا۔
کمیٹی کے اجلاس میں ہائر ایجوکیشن کمیشن (ایچ ای سی) کے چیئرمین نے کہا کہ ایک انتظامی الائونس موجود ہونے کے باوجود امن و امان میں خلل اور وسائل کی کمی کے جاری بہانے جیسے مستقل مسائل پیش رفت میں رکاوٹ ہیں۔ کالجوں کے لیے مختص کیے گئے غیر جمع شدہ فنڈز بڑھتے رہتے ہیں اور درست ڈیٹا فراہم کرنے میں یونیورسٹی کی ناکامی اندرونی اور گورننس سے متعلق مسائل کو بڑھا دیتی ہے۔
چیئرپرسن کمیٹی نے تبصرہ کیا کہ ملک بھر میں یونیورسٹیوں میں اسی طرح کے چیلنجز برقرار ہیں، صوبے ذمہ داری نہیں لیتے، ایک آڈٹ پالیسی جس میں بیرونی اور اندرونی دونوں آڈٹ شامل ہیں، کی فوری ضرورت ہے۔
مزید برآں عبوری وائس چانسلرز کو یا تو مدت کا پابند ہونا چاہیے یا اس طرز عمل پر نظر ثانی کی جانی چاہیے، کیونکہ قائم مقام عہدوں پر اکثر اہم چیلنجز پیش آتے ہیں۔
سینیٹر بشریٰ نے عبوری وائس چانسلر کے عہدے کو مکمل طور پر ختم کرنے کی ضرورت پر زور دیا اور قابل عمل حل تیار کرنے کے لیے کمیٹی کی تشکیل کی تجویز دی۔
انہوں نے کہا کہ ان مستقل مسائل کو موثر طریقے سے حل کرنے کے لیے وسائل کی مناسب تقسیم ضروری ہے۔یونیورسٹی میں طلبہ یونینز پر پابندی کے حوالے سے اٹھائے گئے عوامی اہمیت کے نکتہ کے حوالے سے سینیٹر احسن نے طلبہ یونینوں کو چلانے کے لیے واضح رہنما اصولوں پر زور دیا۔
انہوں نے اس بات پر زور دیا کہ اگرچہ پابندیاں 40-50 سالوں سے نافذ ہیں، لیکن ان پر موثر طریقے سے عمل درآمد نہیں کیا گیا ہے۔
انہوں نے تعلیمی اداروں میں طلبہ یونینز کی بحالی کی وکالت کی۔ تفصیلی بحث کے بعد سینیٹر بشریٰ نے باضابطہ خط و کتابت کے ذریعے آگے بڑھنے کا راستہ تجویز کیا اور تجویز پیش کی کہ کمیٹی کی ہدایت کو مزید تقویت دی جائے۔
56 جونیئر لیڈی ٹیچرز (بی پی ایس 16) اور لیکچررز (بی پی ایس 17) کی پوسٹنگ نوٹیفکیشن کے اجراء کے بارے میں سینیٹر بشریٰ نے کہا کہ کمیٹی نے بڑے مسائل کو حل کرنے کے لیے تندہی سے کام کیا ہے تاہم اساتذہ نے اکثر عدالت سے مداخلت کی اور حکم امتناعی حاصل کیا جس سے عمل میں خلل پڑتا تھا۔
146 اساتذہ کی فہرست فراہم کی گئی اور باقی اساتذہ کو بتایا گیا کہ ان کے معاملات کو حل کر لیا گیا ہے۔ 19 دسمبر سے اساتذہ سے رابطہ کرنے کی کوششیں کی گئی ہیں اور ان تک رسائی کا سلسلہ جاری ہے۔
جامعہ بلوچستان کوئٹہ کے وائس چانسلر نے کنٹریکٹ کی بنیاد پر تعینات ملازمین کی ریگولرائزیشن میں اقرباء پروری اور ذاتی تعصب سے متعلق خدشات کو دور کیا۔
انہوں نے وضاحت کی کہ 10 افراد جو کم از کم 5 سال سے یونیورسٹی میں تھے، نے ریگولرائزیشن کی درخواست کی۔ گورنر ہائوس نے اس کی منظوری دے دی ہے اور ریگولرائزیشن اور ترقیوں کے مسائل کو حل کرنے کے لیے بات چیت جاری ہے۔
سینیٹ کے ڈپٹی چیئرمین نے سوال کیا کہ 24 افراد کو اہلیت کے معیار کی بنیاد پر اس عمل سے کیوں باہر رکھا گیا ہے۔ انہوں نے اس معاملے کو ایک ماہ کے اندر حل کرنے کی ضرورت پر زور دیا۔
چیئرپرسن نے اتفاق کرتے ہوئے کہا کہ اس مسئلے کو حل کرنے کے لیے زیادہ سے زیادہ تین ہفتے مختص کیے جائیں گے۔
اجلاس میں ڈپٹی چیئرمین سینیٹ سینیٹر سیدال خان، سینیٹرز فوزیہ ارشد، سید مسرور احسن، کامران مرتضیٰ، ڈاکٹر افنان اللہ خان، خالدہ عطیب، فلک ناز، وزیر برائے وزارت وفاقی تعلیم و پیشہ ورانہ تربیت، چیئرمین ایچ ای سی، ایڈیشنل سیکرٹری وزارت تعلیم اور متعلقہ محکموں کے سینئر حکام نے شرکت کی۔
