لاہور۔22اپریل (اے پی پی):سیکرٹری داخلہ پنجاب کی ہدایت پر محکمہ جیل خانہ جات کےلئے محکمانہ پروموشن کمیٹی کا اجلاس طلب کر لیا گیا ہے۔ ترجمان محکمہ داخلہ پنجاب کے مطابق ڈپٹی سپرنٹنڈنٹس جیل اور سائیکالوجسٹس کی ترقی کےلئے اجلاس 25 اپریل کو طلب کیا گیا ہے۔ اجلاس میں پنجاب کے 49 اسسٹنٹ سپرنٹنڈنٹس جیل کی بطور ڈپٹی سپرنٹنڈنٹس جیل پروموشن کے کیس زیر بحث آئیں گے۔
اجلاس میں 3 لیڈی اسسٹنٹ سپرنٹنڈنٹس کی بطور ڈپٹی سپرنٹنڈنٹس پروموشن بھی زیر بحث آئے گی اور 3 سائیکالوجسٹس کی پروموشن بھی زیر غور ہو گی۔ ڈیپارٹمنٹل پروموشن کمیٹی میں محکمہ جیل خانہ جات کے 52 افسران گریڈ 16 سے 17 میں ترقی پائیں گے۔ اجلاس ایڈیشنل سیکرٹری پریزن کی صدارت میں ہوگا جس میں آئی جی جیل خانہ جات اور ایڈیشنل سیکرٹری ریگولیشن شریک ہوں گے۔
ترجمان محکمہ داخلہ پنجاب کے مطابق محکمہ داخلہ پنجاب میرٹ کے مطابق افسران کو سینئر سکیل پر پروموٹ کر رہا ہے اور حکومتی پالیسی کے مطابق اہل افسران کو رولز کے تحت بروقت ترقی دی جا رہی ہے۔
Short Link: https://urdu.app.com.pk/urdu/?p=585675
