روم۔12مئی (اے پی پی):جرمنی کے نامور ٹینس سٹار سیکنڈ سیڈڈ اور ایونٹ کے دفاعی چیمپئن الیگزینڈر زویروف اور سپین کے مشہور ٹینس سٹار اور ایونٹ کے تھرڈ سیڈڈ کارلوس الکاراز اپنی عمدہ کارکردگی کی بدولت اے ٹی پی اٹالین اوپن ٹینس ٹورنامنٹ میں مردوں کے سنگلز مقابلوں کے چوتھے رائونڈ میں پہنچ گئے ۔
28 سالہ جرمن ٹینس سٹار الیگزینڈر زویروف نے اٹالین اوپن ٹینس میں مینز سنگلز مقابلوں کے تیسرے رائونڈ میں لتھوانیا کے حریف کھلاڑی ولیس گوباس کو شکست دی جبکہ ہسپانوی ٹینس سٹار کارلوس الکاراز نے تیسرے رائونڈ کے میچ میں 29 سالہ سربین ٹینس سٹار لاسلو جیری کو مات دی۔ اٹالین اوپن ٹینس ٹورنامنٹ کے کانٹے دار مقابلوں کا سلسلہ اٹلی میں جاری ہے جس میں شائقین ٹینس کو انتہائی دلچسپ اور کانٹے دار مقابلے دیکھنے کو مل رہے ہیں۔
مردوں کے سنگلز مقابلوں کے تیسرے رائونڈ میں 28 سالہ جرمن ٹینس سٹار الیگزینڈر زویروف نے انتہائی شاندار کارکردگی کا مظاہرہ کرتے ہوئے لتھوانیا کے حریف کھلاڑی ولیس گوباس کوسٹریٹ سیٹس میں 4-6 اور 0-6سے شکست دے کر اگلے رائونڈ کے لئے کوالیفائی کرلیا،جہاں ان کا مقابلہ فرانسیسی حریف کھلاڑی آرتھر فلز سے ہوگا۔
تیسرے رائونڈ کے ایک اور میچ میں ہسپانوی ٹینس سٹار کارلوس الکاراز نے عمدہ کھیل پیش کرتے ہوئے 29 سالہ سربین ٹینس سٹار لاسلو جیری کو ٹائی بریک پر سٹریٹ سیٹس میں 6-7(2-7)اور 2-6سے ہرا کر پری کوارٹر فائنل کے لئے کوالیفائی کرلیا۔ٹاپ 16 میچ میں کارلوس الکاراز کا مقابلہ روسی حریف ٹینس کھلاڑی کیرن خچانوف سے ہوگا۔
Short Link: https://urdu.app.com.pk/urdu/?p=596068
