کراچی۔ 31 اگست (اے پی پی):محکمہ انسداد دہشت گردی سندھ (سی ٹی ڈی)اور وفاقی حساس ادارے نے شہر قائد کے مختلف علاقوں میں کالعدم تنظیموں کی موجودگی کی اطلاع پر مشترکہ کارروائیاں کرتے ہوئے فتنہ الخوارج اور القاعدہ برصغیر کے 5کارندوں کو گرفتار کرکے ان کے قبضے سے غیر قانونی اسلحہ برآمدکرلیاہے۔
اتوار کو ترجمان سی ٹی ڈی سندھ کے مطابق منگھوپیر اور کشمیر روڈ کے ایم سی اسپورٹس کمپلیکس کے قریب سے انفارمیشن بیسڈ آپریشن کے دوران تحریک طالبان پاکستان کے اللہ نور اور سرفراز جبکہ القاعدہ برصغیر کے سلیم، جہانزیب اور امداد اللہ کو گرفتار کیا گیا ہے۔ترجمان نے بتایا کہ گرفتار ملزمان سے برآمدشدہ اسلحے کو فارنزک رپورٹ کے لیے بھیج دیا گیا ہے۔
گرفتارملزمان پڑوسی ملک سے عسکری تربیت یافتہ ہیں اور کراچی میں دہشتگردی کی منصوبہ بندی کررہے تھے جس پر ان سے مزید تفتیش کی جاری ہے۔ترجمان نے کہا کہ گرفتار ملزمان کے خلاف تھانہ سی ٹی ڈی میں غیر قانونی اسلحہ رکھنے کے مقدمات درج کر لیے گئے ہیں۔
