سی پیک منصوبے کے تحت قائم ہونےوالے ساہیوال کول پاور پلانٹ نے 9 سال کے دوران 120.5 ارب روپے ٹیکس اداکیا، ترجمان

اسلام آباد۔20ستمبر (اے پی پی):سی پیک منصوبے کے تحت قائم ہونےوالے ساہیوال کول پاور پلانٹ نے گزشتہ 9 سالوں کے دوران 120.5 ارب روپے سےزیادہ ٹیکس اداکیا ۔چین کے ہواننگ گروپ کی ملکیت ساہیوال کول پاور پلانٹ کے ترجمان نے اے پی پی کو بتایا کہ ملکی معیشت کے ابھرتے ہوئے منظر نامے میں ساہیوال کول پاور پلانٹ کا کردار نہ صرف توانائی فراہم کرنے والے بلکہ معاشی ترقی اور استحکام کے طاقتور انجن کا ہے۔ اس پلانٹ کے قیام کےبعد سے وفاقی اور صوبائی محصولات میں اضافہ ہواہے ۔

ساہیوال پلانٹ کا مالیاتی اثر کارپوریٹ ٹیکس کے ذریعے براہ راست شراکت سے کہیں زیادہ ہے۔ اس کے ریونیو فلو کا کافی حصہ اس کے وسیع پروکیورمنٹ کے عمل کے ذریعے پیدا ہونے والے ویلیو ایڈڈ ٹیکس سے آتا ہے۔ اس میں کوئلہ، مشینری اور دیکھ بھال کے سامان کی خریداری شامل ہے۔ اس طرح کی ویلیو ایڈڈ ٹیکس ادائیگیاں وفاقی اور صوبائی دونوں حکومتوں کے لیے ایک اہم ریونیو اسٹریم کے طور پر کام کرتی ہیں، جو اہم خدمات اور بنیادی ڈھانچے کے منصوبوں کو فنڈ دینے کی ان کی صلاحیت کو تقویت دیتی ہیں۔

ساہیوال پلانٹ کی موجودگی نے مقامی صنعتوں کی ترقی کو تحریک دی ہے جو کہ مختلف ذرائع سے صوبائی محصولات میں حصہ ڈالتی ہے۔ پلانٹ کے ارد گرد اقتصادی ماحول کو فروغ دینے سے یہ مقامی معیشت میں اہم شراکت دار بن گیا ہے ۔ پاور پلانٹ نے وفاقی اور صوبائی حکومتوں کو تقریباً 120.5 بلین روپے ٹیکس ادا کیا۔ یہ ٹیکس ادائیگی اقتصادی ترقی کو آگے بڑھانے اور عوامی مالیات کو سہارا دینے میں پلانٹ کے کردار کا ثبوت ہے۔

ساہیوال کول پاور پلانٹ نے 2016 میں 7,16,97,96,845، 2017میں15001750016روپے،2018 میں 12,956,706,849، 2019 میں 12,650,259,537، 2020 میں 10,523,670,449، 2021 میں 19,922,310,166روپے، 2022میں 22,303,996,506روپے ، 2023میں 16,047,480,281روپے اور 2024 میں 3,972,564,848روپے ٹیکس جمع کرایا۔۔ اس میں ودہولڈنگ ٹیکس، وفاقی اور صوبائی کے سیلز ٹیکس، کارپوریٹ انکم ٹیکس اور درآمد پر ڈیوٹیز بھی شامل ہے۔

انکم ٹیکس کی آمد سے نہ صرف صوبائی محصولات میں اضافہ ہوتا ہے بلکہ مقامی ترقیاتی منصوبوں اور کمیونٹی سروسز کی مالی اعانت میں بھی مدد ملتی ہے، جو کہ مقامی اقتصادی قوت کو چلانے میں پلانٹ کے کردار کو ظاہر کرتی ہے۔