اسلام آباد۔12ستمبر (اے پی پی):سی ڈی اے نے تجاوزات کے خلاف آپریشن کرتے ہوئے انڈسٹریل ٹرائی اینگل کہوٹہ کے پلاٹ نمبر M-1 کی زمین پر غیر قانونی قابضین سے قبضہ واگزار کرا لیا۔منگل کو سی ڈی اے کی جانب سے جاری بیان کے مطابق کیپٹل ڈویلپمنٹ اتھارٹی کے انفورسمنٹ ڈائریکٹوریٹ نے کارروائی عمل میں لاتے ہوئے تجاوزات کے خلاف جاری آپریشن کے تسلسل میں انڈسٹریل ٹرائی اینگل کہوٹہ کے پلاٹ نمبر M-1 کی زمین پر غیر قانونی قابضین سے قبضہ واگزار کرا لیا۔
واضح رہے مذکورہ پلاٹ پر قبضہ مافیا نے 3 سال سے زائد عرصہ سے قبضہ کر رکھا تھا جس کو بھرپور کارروائی عمل میں لاتے ہوئے واگزار کرا لیا گیا۔ آپریشن کے نتیجہ میں 33 کنال اراضی واگزار کرالی گئی ہے جس کی مالیت تقریباً 6 ارب روپے بنتی ہے۔
اس آپریشن میں ڈپٹی ڈی جی انفورسمنٹ، ڈپٹی کمشنر سی ڈی اے ، متعلقہ شعبوں کے افسران، اسلام آباد انتظامیہ اور اسلام آباد پولیس نے بھی حصہ لیا۔
واضح رہے کیپٹل ڈویلپمنٹ اتھارٹی کی انتظامیہ غیر قانونی تعمیرات اور تجاوزات کے خلاف آپریشن کرنے میں مصروف ہے جس کے نتیجہ میں اربوں روپے کی سرکاری اراضی واگزار کرائی جاچکی ہے اور سرکاری اراضی پر غیر قانونی قابضین کے خلاف یہ آپریشن تسلسل کے ساتھ جاری رہے گا۔
Short Link: https://urdu.app.com.pk/urdu/?p=389793
