اسلام آباد ۔ 24 مارچ (اے پی پی)وزیر خارجہ شاہ محمود قریشی نے منگل کو کورونا عالمی وباءکے حوالہ سے وزارت خارجہ میں قائم کئے گئے ”کرائسز مینجمنٹ سیل“ کا دورہ کیا۔ سیکرٹری خارجہ سہیل محمود، سپیشل سیکرٹری معظم علی خان اور وزارت خارجہ کے سینئر حکام بھی اس موقع پر موجود تھے۔ وزیر خارجہ نے وزارت خارجہ میں قائم کئے گئے ایمرجنسی کرائسز مینجمنٹ سینٹر کے مختلف سیکشنز کا دورہ کیا اور انتظامات پر اطمینان کا اظہار کیا۔ اس کرائسز مینجمنٹ سیل کا قیام، کورونا انفیکشن کو عالمی وباءقرار دیئے جانے کے بعد ہنگامی طور پر عمل میں لایا گیا۔ وزیر خارجہ نے ڈی جی کرائسز مینجمنٹ کو ہدایت کی کہ دنیا بھر میں موجود پاکستانی سفارتخانوں میں نامزد فوکل پرسنز کے ساتھ مستقل رابطے کے ذریعے معلومات کی بروقت ترسیل کو یقینی بنایا جائے۔ انہوں نے کورونا عالمی وباءکے پیش نظر پاکستانی سفارتخانوں کو دنیا بھر میں مقیم پاکستانی کمیونٹی کے ساتھ روابط کو فروغ دینے کی ہدایت بھی کی۔ شاہ محمود قریشی نے کہا کہ اس عالمی وباءکے تناظر میں دنیا بھر میں مقیم پاکستانیوں کو درپیش مشکلات اور مسائل کو روزانہ کی بنیاد پر شیئر کیا جائے تاکہ ان مسائل کو ترجیحی بنیادوں پر فوری حل کیا جا سکے۔کرائسز مینجمنٹ سیل اس کورونا وبائی چیلنج کے دوران ہمہ وقت 24/7 بنیادوں پر کام کرتا رہے گا۔ اس ہنگامی کرائسز مینجمنٹ سیل کے ذریعے لمحہ بہ لمحہ معلومات کو جمع کرکے بھجوایا جائے تاکہ ان معلومات سے استفادہ کرتے ہوئے اس چیلنج سے نمٹنے کیلئے مو¿ثر لائحہ عمل مرتب کرنے میں مدد مل سکے۔
