اسلام آباد ۔ 13 جنوری(اے پی پی)موٹروے اورقومی ہائی ویز کے مختلف حصوں کو اتوار کی صبح شدید دھند کے باعث ٹریفک کے لیے بند کردیا گیا۔موٹروے پولیس کے مطابق ایم ون پر پشاورتا رشکئی، ایم تھری پرپنڈی بھٹیاں تا فیصل آباد، فیصل آباد تا گوجرہ، اورخانیوال تا ملتان سیکشن کو شدید دھند کے باعث عام ٹریفک کے لیے بندکردیا گیا۔اسی طرح ملتان،چیچہ وطنی ، میاں چنوں، بہاولپور، رحیم یارخان اورصادق آباد میں بھی شدید دھند کی وجہ سے ٹریفک کو رواں روکنے میں شدید مشکلات کاسامنا رہا۔موٹروے پولیس کے ترجمان نے شہریوں کودھند کے دوران غیرضروری سفرکرنے اور دھند کے بارے میں معلومات کے حصول کے لیے ہیلپ لائن 130 پر رابطہ کرنے کی ہدایت کی گئی ہے۔
