تیانجن۔31اگست (اے پی پی):وزیراعظم محمد شہباز شریف چین کے شہر تیانجن میں شنگھائی تعاون تنظیم کےسربراہان مملکت کونسل کے25 ویں اجلاس کے شرکاء کے اعزاز میں منعقدہ استقبالیہ تقریب میں عالمی رہنماؤں کی توجہ کا مرکز بنے رہے، عالمی رہنماؤں نے وزیراعظم کے ساتھ مصافحہ کیا ، بغل گیر ہوئے ، خوشگوار اور تعریفی کلمات اور نیک تمنائوں کا تبادلہ کیا،تقریب میں پہنچنے پر چین کے صدر شی جن پنگ اور چینی خاتون اول نے وزیراعظم کا پرتپاک استقبال کیا ۔
اس موقع پر وزیرِ اعظم سے روسی صدر ولادیمیر پیوٹن، ملائشیا کے صدر انور ابراہیم، بیلاروس کے صدر الیکزانڈر لوکاشینکو، آذربائیجان کے صدر الہام علییوف، ترک صدر رجب طیب ایردوان، تاجک صدر امام علی رحمن، ترکمانستان کے صدر بردی محمدیوف، کرغستان کے صدر سیدر ژاپاروف، مالدیپ کے صدر محمد معیزو ، اقوام متحدہ کے سیکرٹری جنرل اینتونیو گوئیترس نے غیر رسمی ملاقاتیں کیں۔
ملاقاتوں کے دوران وزیرِ اعظم شہباز شریف سے عالمی رہنماؤں کی غیر معمولی گرمجوشی دیکھنے میں آئی،ان ملاقاتوں میں دیکھی گئی قربت پاکستان اوران ممالک کے مابین برادرانہ اور دوستانہ تعلقات کی عکاس ہے۔
