بیجنگ ۔24اگست (اے پی پی):چین کی وزارت تجارت کے مطابق حالیہ برسوں میں شنگھائی تعاون تنظیم نے علاقائی اقتصادی تعاون میں نئی پیش رفت حاصل کی ہے اور باہمی تجارت مسلسل بڑھ رہی ہے۔ رواں سال جنوری سے جولائی تک ایس سی او کے رکن ممالک کے ساتھ چین کی تجارت 293.18 ارب ڈالر تک پہنچ گئی جس میں سالانہ 1.8 فیصد اضافہ ہوا ہے۔
چینی میڈیا کے مطابق گزشتہ پانچ سال میں شنگھائی تعاون تنظیم کے رکن ممالک کے ساتھ چین کی تجارت کا حجم یکے بعد دیگرے 300 ارب ڈالر، 400 ارب ڈالر اور 500 ارب ڈالر سے تجاوز کرتے ہوئے 2024 میں 512.4 ارب ڈالر تک پہنچ گیا ۔2024 میں چین کی دیگر رکن ممالک سے سرحد پار ای کامرس درآمدات میں سال بہ سال 34 فیصد اضافہ ہوا اور ای کامرس چینلز کے ذریعے زیادہ سے زیادہ اعلیٰ معیار کی اسپیشلٹی مصنوعات چینی مارکیٹ میں داخل ہوئیں۔
اس کے ساتھ ساتھ رکن ممالک میں سرمایہ کاری اور اقتصادی و تکنیکی تعاون بھی تیزی سے آگے بڑھ رہا ہے۔ رواں سال جولائی تک ایس سی او کے دیگر رکن ممالک میں چین کی جانب سے مختلف صنعتو ں میں براہ راست سرمایہ کاری 40 ارب ڈالر سے تجاوز کر چکی ہے اور سرمایہ کاری کے منصوبے آہستہ آہستہ روایتی شعبوں سمیت توانائی ، معدنیات اور بنیادی ڈھانچے کی تعمیر سے ڈیجیٹل معیشت اور سبز ترقی جیسے ابھرتے ہوئے شعبوں کی جانب پھیل رہے ہیں۔
