شہدا ءقوم کے اصل ہیرو ہیں،دشمن پاکستان کی طرف میلی آنکھ سے دیکھنے کی جرات نہیں کر سکتا، محسن نقوی

لاہور۔12مئی (اے پی پی):وفاقی وزیر داخلہ محسن نقوی نے کہا ہے کہ شہدا قوم کے اصل ہیرو ہیں،بھارت کے خلاف کامیابی انہیں شہیدوں کے خون سے ملی،ہماری فوج نے دشمن کو ایسا سبق سکھایا کہ اب وہ پاکستان کی طرف میلی آنکھ سے دیکھنے کی جرات نہیں کر سکتا،شہدا کی قربانیاں رائیگاں نہیں جائیں گی،حکومت شہیدوں کے خاندانوں کو تنہا نہیں چھوڑے گی۔ان خیالات کا اظہار انہوں نے پیر کے روز ڈرون حملے میں شہید ہونے والے علی حیدر کی رہائش گاہ واقع چونگی امر سدھو پر میڈیا سے غیر رسمی گفتگو کرتے ہوئے کیا۔اس موقع پر سی سی پی او لاہور بلال کمیانہ و دیگر بھی موجود تھے۔

وفاقی وزیر داخلہ نے کہاکہ پوری قوم نے فوج کے شانہ بشانہ دشمن کو دندان شکن جواب دیا،بھارت اب ایڈونچر کرنے سے پہلے سو بار سوچے گا۔انہوں نے کہاکہ ہمیں بھارت سے کامیابی ہمارے شہیدوں کے خون سے ملی ہے،ان شہدا کی قربانیوں کو رائیگاں نہیں جانے دیا جائے گا۔قبل ازیں وفاقی وزیر داخلہ نے علی حیدر شہید کے والد محمد اسلم اور والدہ شمیم بی بی سے تعزیت کی اور شہیدکے درجات کی بلندی و مغفرت کیلئے فاتحہ خوانی کی۔

وفاقی وزیر داخلہ محسن نقوی نے شہید علی حیدر کے والدین کو دلاسہ دیا اور دلجوئی کی اور کہا کہ حکومت شہدا کے خاندان کو تنہا نہیں چھوڑے گی،ہم شہید کے اہل خانہ کے ساتھ کھڑے ہوں گے،آپ کا اکلوتا سہارا چلا گیا،اللہ تعالی آپ کو صبر جمیل عطا فرمائے،حکومت آپ کے خاندان کا سہارا بنے گی۔واضح رہے کہ شہید علی حیدر 8بہنوں کا اکلوتا بھائی تھا اور پنڈی کرکٹ سٹیڈیم کے باہر برگر کا کاروبار کرتا تھا جو گزشتہ دنوں راولپنڈی سٹیڈیم میں بھارت کی جانب سے ڈرون حملے میں شہید ہو گیا تھا۔

Short Link: https://urdu.app.com.pk/urdu/?p=596094