لاہور۔6جولائی (اے پی پی):وزیراعلیٰ پنجاب مریم نوازنے یوم عاشورہ پراپنے پیغام میں کہا ہے کہ حضرت امام حسین اوران کے جلیل القدر رفقا کو سلام پیش کرتے ہیں ، اہل بیت سے محبت ہر مسلمان کے عقیدے اور ایمان کاجز ہے، حضرت امام حسین کی شہادت نے امر کر دیا کہ تخت و تاج فانی ہے اصول اور ایمان باقی ہیں ، شہادت حسین محض رنج و الم کا استعارہ نہیں بلکہ تحریک حیات ہے، حسن او رحسین حضرت محمد ﷺکے دو پھول ہیں ،
حضرت امام حسین کی جدوجہد کا بنیادی ہدف ظلم و جبر اور انسانی حقوق کی پامالی کے خلاف سینہ سپر ہونے کے شعور کو بیدار کرنا تھا ۔ انہوں نے کہا کہ حضرت امام حسین اور ان کے جانثار ساتھیوں کی عظیم قربانی تاریخ عالم کا درخشاں باب ہے، شہدا کربلا کی یادتا ابد مظلوم قوموں کو حوصلہ او رولولہ عطا کرتی رہے گی ، مٹانے والے خود مٹ گئے،حضرت امام حسین اور ان کے ساتھی ہمیشہ کیلئے امر ہوگئے۔
حضرت امام حسین کی شہادت کی صدائے انقلاب ہر دور میں بلند ہوتی رہی ہے او ررہے گی ۔ وزیراعلیٰ نے کہا کہ نواسہ رسول ﷺکی جدوجہد ظلم اور جبر کے خلاف سینہ سپر ہونے کا ابدی پیغام ہے ، یوم عاشور پر ہمیں حضرت امام حسین کی درخشاں تعلیمات کے مطابق عمل پیرا ہونے کا اعادہ بھی کرنا ہے۔
وزیراعلی پنجاب نے کہاکہ واقعہ کربلا حق گوئی او رظلم کے خلاف آواز کی جرات کی ترغیب دیتا ہے، محرم الحرام ہمیں انفرادی و اجتماعی فلاح اور باہمی اتحاد کا پیغام دیتا ہے۔
