اسلام آباد ۔ 20مارچ (اے پی پی) وفاقی وزیر برائے منصوبہ بندی، ترقی و اصلاحات و خصوصی اقدامات اسد عمر نے کہا ہے کہ شہری عوامی مقامات اور اجتماع سے دور رہیں، اسلام آباد کے شہری احتیاطی تدابیر پر عمل پیرا ہوں، اسلام آباد کے سکول، کالجز، جمز کو بند رکھا جائے گا۔ ان خیالات کا اظہار انہوں نے جمعہ کو وزارت منصوبہ بندی میں کورونا وائرس کے حوالے سے اجلاس سے خطاب کرتے ہوئے کیا۔ اجلاس میں معاون خصوصی برائے سی ڈی اے افئیرز علی نواز اعوان، چیئرمین قائمہ کمیٹی برائے داخلہ راجہ خرم نواز، ڈی سی اسلام آباد، وزارت صحت، اور پم کے اعلیٰ حکام بھی موجود تھے ۔ اجلاس میںاسلام آباد میں کورونا وائرس سے بچاؤ کیلئے احتیاطی اقدامات کا جائزہ لیا گیا۔اسد عمر نے کہا کہ اسلام آباد کے مکین احتیاطی تدابیر پر عمل پیرا ہوں، عوامی مقامات اور اجتماع سے دور رہیں۔ انہوں نے کہا کہ اسلام آباد کے سکول، کالجز، جمز کو بند رکھا جائے گا،اسلام آباد میں کرونا وائرس کے پھیلاؤ کو روکنے کیلئے آگاہی مہم شروع کر دی گئی ہے،اس آگاہی مہم کے تحت پولیو ٹیمز کرونا وائرس بارے پیغام بھی گھر گھرپہنچا رہی ہیں۔ وفاقی وزیر نے کہا کہ اس ضمن میں گھر گھر پمفلٹس کی تقسیم بھی جاری ہے۔
