اسلام آباد۔19اگست (اے پی پی):وزیر اعظم کی کوآرڈینیٹر برائے موسمیاتی تبدیلی اور ماحولیاتی رابطہ رومینہ خورشید عالم نے کہا ہے کہ وہ ملک میں شہری ماحولیاتی اقدمات اور دیہی علاقوں میں متبادل توانائی کے ذرائع متعارف کرانے کے لئے ڈونرز کے ساتھ ساتھ بڑے بینکوں کو شامل کرکے جاری منصوبوں کے لئے وسائل کو متحرک کر رہی ہیں۔ پیر کو یہاں جاری بیان کے مطابق یہ بات انہوں نے اقوام متحدہ کے ترقیاتی پروگرام (یو این ڈی پی) کے وفد سے ملاقات کے دوران کہی۔
فعال مواصلات اور رابطہ کاری کے پیش نظر وزیر اعظم کی معاون نے ایک ڈیش بورڈ قائم کرنے پر زور دیا جو وزیر اعظم کے دفتر سے بھی منسلک ہو گا تاکہ پیشرفت کا جائزہ اور چیلنجوں سے نمٹا جاسکے جس کا مقصد منصوبوں کی تیز رفتار ٹریکنگ اور مقاصد کے حصول کو یقینی بنانا ہے۔ فضائی آلودگی سے نمٹنے کے لئے وزارت موسمیاتی تبدیلی اور ماحولیاتی رابطہ اور یو این ڈی پی کے تعاون سے مونٹریال پروٹوکول پراجیکٹ کو ملک بھر میں شروع کر رہا ہے جو اوزون اور ہائیڈرو کلورو فلورو کاربن کو ٹھیک کرے گا۔ اس پراجیکٹ کو ملٹی لیٹرل فنڈ سیکرٹریٹ نے594748 ڈالر مالیت کے بجٹ کے ساتھ فنڈ کیا ہے اور یہ 2027 میں مکمل ہوگا۔
اجلاس میں-II GLOF پراجیکٹ پر بھی تبادلہ خیال کیا گیا جو گلگت بلتستان کے 10 اضلاع اور خیبر پختونخوا کے 8 اضلاع پر توجہ مرکوز کررہا ہے جس کا بجٹ 37 ملین ڈالر گرین کلائمیٹ فنڈ سے فراہم کیا جا رہا ہے۔ اس منصوبے کا مقصد سیلاب کے خطرات کو کم کرنا ہے اور کمیونٹی کے 696000 افراد اس منصوبے سے براہ راست مستفید ہوتے ہیں۔ گرین ہاوس گیسوں کے اخراج کو کم کرکے موسمیاتی تبدیلیوں سے نمٹنے کے لیے وزارت ملک میں ایک نیا پراجیکٹ ” پروموشن اینڈ ایپلیکیشن آف سسٹین ایبل بایوماس انرجی ٹیکنالوجیز” بھی شروع کر رہی ہے جو 2028 میں مکمل ہوگا۔
اجلاس میں "ماحولیاتی خطرات کے خلاف گلوبل شیلڈ” پراجیکٹ پر بھی تبادلہ خیال کیا گیا جس کا مقصد آفات کے خلاف پہلے سے مرتب شدہ مالیات کو کافی حد تک زیادہ اور بہتر انداز اور سہولت فراہم کرکے ضرورت مند افراد کے تحفظ کو بڑھانا ہے۔ یو این ڈی پی کو اپنے مکمل تعاون کی یقین دہانی کراتے ہوئے وزیر اعظم کی معاون نے کہا کہ وزیر اعظم کی قیادت میں حکومت ملک کو موسمیاتی لحاظ سے ریزیلینٹ بنانے کے لئے پرعزم ہے۔
Short Link: https://urdu.app.com.pk/urdu/?p=495424
