اسلام آباد۔7اپریل (اے پی پی):سپیکر قومی اسمبلی سردار ایاز صادق نے کہا ہے کہ صحت مند معاشرے کے قیام کیلئے معیاری خوراک کی فراہمی ناگزیر ہے،پارلیمان صحت کے شعبے میں قانون سازی کے لیے پر عزم ہے۔پیر کو قومی اسمبلی سیکرٹریٹ سے جاری بیان کے مطابق عالمی یوم صحت کے موقع پر اپنے پیغام میں انہوں نے کہا کہ صحت اللہ تعالیٰ کی جانب سے ایک عظیم نعمت ہے۔ صحت مند معاشرہ ہی ترقی یافتہ اور خوشحال قوم کی ضمانت ہے۔
سپیکر قومی اسمبلی نے کہا کہ عالمی یوم صحت عوام میں شعور و آگاہی اجاگر کرنے کا موقع فراہم کرتا ہے۔ معیاری طبی سہولیات کی فراہمی ہر فرد کا بنیادی حق ہے۔ صحت مند طرز زندگی اپنانا بیماریوں سے بچاؤ کیلئے ضروری ہے۔ صحت مند رہنے کیلئے معیاری خوراک کا استعمال ضروری ہے۔ صحت مند معاشرے کے قیام کیلئے معیاری خوراک کی فراہمی ناگزیر ہے۔انہوں نے کہا کہ معیاری خوراک کی فراہمی کیلئے مشترکہ کوششوں کی ضرورت ہے۔ عالمی وباؤں اور موسمیاتی تبدیلیوں کے تناظر میں صحت عامہ کے نظام کو مضبوط بنانا ضروری ہے۔ صحت کے شعبے کو مضبوط بنانا وقت کی اہم ضرورت ہے۔
عالمی یوم صحت، صحت مند طرزِ زندگی کو فروغ دینے کا دن ہے۔ پسماندہ اور دور دراز علاقوں میں صحت کی سہولیات پہنچانا ضروری ہیں،پارلیمان صحت کے شعبے میں قانون سازی کے لیے پر عزم ہے۔ صحت مند قوم ہی مضبوط قوم بن سکتی ہے۔
عوام صحت سے متعلق احتیاطی تدابیر اختیار کریں۔ حکومت، ادارے اور سول سوسائٹی صحت کے شعبے کی بہتری کے لیے کردار ادا کریں،عوام کو صحت مند سرگرمیوں میں بڑھ چڑھ کا حصہ لینا چاہیے، حفظان صحت کے اصولوں پر عمل پیرا ہو کر بیماریوں سے بچا جا سکتا ہے۔ سردار ایاز صادق نے کہا کہ نوجوان نسل کو کھیل کود اور ورزش کے ذریعے اپنی صحت کو مضبوط بنانے کی ضرورت ہے۔
Short Link: https://urdu.app.com.pk/urdu/?p=579069
