اسلام آباد۔6مئی (اے پی پی):صدرِ مملکت آصف علی زرداری نے روس کے ساتھ تجارت، سرمایہ کاری، ٹیکنالوجی اور عوامی سطح پر روابط کے شعبوں میں دوطرفہ تعاون کو مزید وسعت دینے کے عزم کا اعادہ کیا ہے۔وہ منگل کو روسی فیڈریشن کی جنگ میں فتح کی 80 ویں سالگرہ کے موقع پر منعقدہ ایک تقریب سے خطاب کررہے تھے۔ انہوں نےپاکستان اور روس کے تعلقات میں بڑھتی ہوئی پیشرفت کو اجاگر کیا اور اس اعتماد کا اظہار کیا کہ دونوں ممالک کے حالیہ اعلیٰ سطحی روابط نے باہمی اشتراک اور بہتر تفہیم کے لئے ایک مضبوط بنیاد فراہم کی ہے۔صدر آصف علی زرداری نے کہا کہ مجھے یقین ہے کہ پاکستان اور روس کے درمیان دوستی کے رشتے مزید مضبوط ہوں گے۔انہوں نے کہا کہ دونوں ممالک کے پاس تجارت، سرمایہ کاری، ٹیکنالوجی اور عوامی روابط کے میدان میں تعاون کو وسعت دینے کی بے پناہ صلاحیت موجود ہے۔
صدرِ مملکت نے روسی صدر ولادی میر پیوٹن، روسی حکومت اور عوام کو اس موقع پر دلی مبارکباد پیش کی اور کہا کہ یہ فتح روسی عوام کی استقامت، قوت اور امن و خوشحالی کے لئے ان کے پختہ عزم کی مظہر ہے۔ انہوں نے اس بات کا بھی ذکر کیا کہ وادیِ سندھ کے لوگوں جو آج کے پاکستان میں آباد ہیں،نے بھی نازی ازم کے خلاف جنگ میں برطانوی فوج کے تحت اہم کردار ادا کیا۔صدرمملکت آصف علی زرداری نے 2011ء میں اپنے دورہ روس کا ذکر کرتے ہوئے صدر ولادی میر پیوٹن کی جانب سے پاکستان-روس دوستی کے فروغ کے لئے کی گئی کوششوں کو سراہا۔ انہوں نے روس کو ایک "اہم عالمی طاقت” قرار دیا اور خاص طور پر جنوبی ایشیا میں امن و استحکام کے فروغ اور پاکستان و بھارت کے درمیان کشیدگی میں کمی کے لئے روس کے کردار کو سراہا۔صدرِ مملکت نے پاکستان اور روس کے درمیان مفاہمت اور تعاون کو فروغ دینے کے عزم کا اعادہ کیا اور خطے و دنیا کے بہتر مستقبل کے لئے باہمی اشتراکِ عمل پر زور دیا۔
Short Link: https://urdu.app.com.pk/urdu/?p=593592
