اسلام آباد ۔ 4 ستمبر (اے پی پی) آزاد جموں و کشمیر کے صدر سردار مسعود خان نے کہا ہے کہ ہم حالت جنگ میں ہیں کیونکہ بھارت نے عملاً جنگ کا آغاز کر دیا ہے جو طویل بھی ہو سکتی ہے اور اس کے پورے خطے کےلئے بھیانک مضمرات بھی ہو سکتے ہیں، مقبوضہ جموں وکشمیر میں بھارتی قابض فوج کی طرف سے کشمیریوں کے خلاف مظالم کی نئی لہر کے بعد بڑے پیمانے پر مقبوضہ کشمیر سے شہری آبادی کے انخلاءاور مہاجرین کی آزادکشمیر میں آمد کو خارج از امکان نہیں قرار دیا جا سکتا جس کےلئے ہمیں تیاری کرنا ہو گی۔ ان خیالات کا اظہار انہوں سنٹر فار ایروسپیس اینڈ سکیورٹی سٹڈیز کے زیر اہتمام کشمیر کے مستقبل کے حوالہ سے تھنک ٹینک کانفرنس سے خطاب کرتے ہوئے کیا۔ صدر آزاد کشمیر نے کہا کہ لوگ ہم سے پوچھتے ہیں کہ پاکستان اور بھارت کے درمیان کشمیر کے تنازعہ پر جنگ ہو سکتی ہے یا نہیں تو میرا جواب یہی ہوتا ہے کہ بھارت اس جنگ کا آغاز کر چکا ہے بھارتی حکمرانوں نے ایک پالیسی اختیار کر لی ہے جس کے تحت وہ اپنے مسلمان شہریوں ، پاکستان اور کشمیریوں کو اپنا دشمن قرار دے کر ان کے خلاف اقدامات شروع کر چکا ہے، بھارت خطہ کی بڑی معاشی اور فوجی قوت بن کر تھانیدار کا کردار ادا کرنا چاہتا ہے اور وہ پاکستان کو اپنے عزائم کی راہ میں رکاوٹ سمجھتا ہے اس لئے وہ ہر صورت میں پاکستان کو عدم استحکام سے دوچار کرنا چاہتا ہے۔
