اسلام آباد۔28اپریل (اے پی پی):صدر مملکت آصف علی زرداری نے شمالی وزیرستان میں سنیٹائزیشن آپریشن میں مزید 17 خوارج کو جہنم واصل کرنے پر سکیورٹی فورسز کو خراج تحسین پیش کیا ہے۔ پیر کو ایوان صدر کے پریس ونگ سے جاری بیان کے مطابق صدر مملکت نے کارروائی کے دوران فتنۃ الخوارج کے 17 دہشت گردوں کا قلع قمع کرنے پر سکیورٹی فورسز کی بہادری کو سراہا۔
انہوں نے دہشت گردوں کے خلاف گزشتہ روز کی بڑی کارروائی کے بعد مزید دہشت گردوں کو جہنم واصل کرنے پر سکیورٹی فورسز کی تعریف کی۔ صدر نے کہا کہ دہشت گردوں کے مکمل خاتمے تک سکیورٹی فورسز کی کارروائیاں جاری رہیں گی۔ انہوں نے کہا کہ پاکستان کی سکیورٹی فورسز کا دہشت گردی کے خاتمے کے لئے کامیاب کارروائیاں کرنا خوش آئند ہے۔
صدر آصف علی زرداری نے کہا کہ دہشت گرد عناصر کے خاتمے، ملکی دفاع کے لئے ہمارا عزم غیر متزلزل رہے گا۔ انہوں نے فتنۃ الخوارج کے مکمل خاتمے کے قومی عزم کا بھی اظہار کیا۔
Short Link: https://urdu.app.com.pk/urdu/?p=588840
