اسلام آباد۔5نومبر (اے پی پی):اسلام آباد چیمبر آف کامرس اینڈ انڈسٹری (آئی سی سی آئی)کے نئے منتخب صدر ناصر محمد قریشی کی قیادت میں وفد نے منگل کو نیشنل یونیورسٹی آف ماڈرن لینگویجز کا دورہ کیا۔ وفد نے ریکٹر نمل یونیورسٹی میجر جنرل (ر) شاہد محمود کیانی سے ان کے دفتر میں ملاقات کی جس میں اکیڈمیہ اور صنعت کے درمیان روابط کو مضبوط بنانے اور طلبا کو اہم پیشہ وارانہ مہارتوں سے آراستہ کرنے کی حکمت عملیوں پر گفتگو کی گئی۔
ڈائریکٹر جنرل/پرو ریکٹر ریسورسز نمل یونیورسٹی بریگیڈیئر شہزاد منیر بھی اس موقع پر موجود تھے۔ریکٹر نمل یونیورسٹی نے ناصر قریشی کو آئی سی سی آئی کا صدر منتخب ہونے پر مبارکباد دی اور ان کے لئے نیک خواہشات کا اظہار کیا۔اکیڈمیہ اور صنعت کے اشتراک کی اہمیت پر زور دیتے ہوئے ریکٹر نمل یونیورسٹی نے مقامی صنعتوں کے ساتھ شراکت داری کے ذریعے تعلیمی اداروں کے صنعتی اور معاشی ترقی میں کردار کو اجاگر کیا۔ انہوں نے کہا کہ یونیورسٹیوں اور صنعت کے درمیان مضبوط روابط پیداواریت، کارکردگی اور مسابقت کو بڑھانے کے لئے ضروری ہیں،
جامعات صنعتی چیلنجز سے نمٹنے اور ملک کی معاشی ترقی میں حصہ ڈالنے میں اہم کردار ادا کر سکتی ہیں۔ ملاقات کے دوران ریکٹر نمل یونیورسٹی میجر جنرل (ر) شاہد محمود کیانی نے محققین اور مقامی صنعت کے درمیان زیادہ بہتر ہم آہنگی کی ضرورت پر زور دیتے ہوئے کہا کہ صنعت کار اپنے چیلنجز جامعات کے ساتھ شیئر کریں تاکہ اکیڈمیہ عملی حل فراہم کر سکے، اس طرح کا اشتراک طلباء کو عملی تجربے فراہم کرے گا جس سے ان کی ملازمت کے مواقع میں اضافہ ہوگا اور قومی ترقی میں معاونت ملے گی۔
صدر آئی سی سی آئی نے ایک مضبوط اور پائیدار اکیڈمیہ وانڈسٹری شراکت داری بنانے میں مکمل تعاون کی یقین دہانی کرائی۔ انہوں نے امید ظاہر کی کہ یہ تعاون مقامی طور پر صنعتی ترقی کو فروغ دے گا اور نمل یونیورسٹی کے طلباء اور مقامی کاروبار دونوں کے لئے فائدہ مند ثابت ہوگا۔
