راولپنڈی۔30مارچ (اے پی پی):صدر بیرونی پولیس نے پٹرول پمپ سٹاف سے اسلحہ کی نوک پر کیش چھیننے والے دونوں ملزمان کو گرفتار کر لیا۔ ترجمان راولپنڈی پولیس کے مطابق ملزمان سے چھینی گئی مکمل رقم 19 لاکھ 22 ہزار 640 روپے برآمد کر لی گئی۔
گرفتار ملزمان میں پمپ ملازم فیضان اور انظر گل عرف بورہ (افغان شہری) شامل ہیں۔ ایس ایس پی آپریشنز کاشف ذوالفقار نے ڈاکوؤں سے برآمد کی گئی رقم مدعی کے حوالے کر دی۔ واقعہ کی اطلاع پر سی پی او سید خالد ہمدانی نے نوٹس لیتے ہوئے ملزمان کی فوری گرفتاری کا حکم دیا تھا۔
پٹرول پمپ سٹاف کیش لے کر بینک جا رہا تھا کہ راستے میں ملزمان نے گن پوائنٹ پر کیش چھین لی۔ صدر بیرونی پولیس نے واقعہ کا مقدمہ درج کر کے ٹیکنیکل ذرائع اور ہیومن انٹیلی جنس کے ذریعے ملزمان کو ٹریس کر کے گرفتار کیا۔ ملزمان کو ٹھوس شواہد کے ساتھ چالان کر کے قرار واقعی سزا دلوائی جائے گی۔
ڈکیتی کے ملزمان کی قلیل وقت میں گرفتاری اور سو فیصد برآمدگی پر سی پی او سید خالد ہمدانی نے ٹیم کو شاباش دی اور کہا کہ شہریوں کو ان کے قیمتی اثاثے سے محروم کرنے والے قانون کی گرفت سے نہیں بچ سکتے۔ مقدمہ کے مدعی نے ملزمان کی گرفتاری اور سو فیصد رقم کی برآمدگی پر راولپنڈی پولیس کا شکریہ ادا کیا۔
Short Link: https://urdu.app.com.pk/urdu/?p=577405
