راولپنڈی ۔26فروری (اے پی پی):سیکرٹری دفاع لیفٹیننٹ جنرل (ر) محمد علی (ہلال امتیاز ملٹری) نے صدر بینک روڈ انڈر گرائونڈ کیبلنگ اینڈ اپ لفٹنگ پراجیکٹ کا افتتاح کر دیا۔ افتتا حی تقریب میں کور کمانڈ ر راولپنڈی لیفٹیننٹ جنرل شاہد امتیاز (ہلا ل امتیاز ملٹر ی)، ڈی جی ایم ایل اینڈ سی میجر جنرل عرفان احمد ملک، چیف سیکرٹری پنجاب زاہداختر زمان، کمشنر راولپنڈی عامر خٹک، آئی جی اسلام آباد سید علی ناصر رضوی،پریزیڈ نٹ کنٹونمنٹ بورڈ بریگیڈئیر احمد نواز،ڈائریکٹر ایم ایل اینڈ سی عامر مسعود خان، ایگریکٹو آفیسر راولپنڈی کینٹ بورڈ سید علی عرفان رضوی، ایم این اے ملک ابرار،ایم این اے دانیال چوہدری اور ایم ایل اینڈ سی کے افسران نے شرکت کی۔
پریزیڈ نٹ کنٹونمنٹ بورڈ بریگیڈئیر احمد نواز اور سی ای او سید علی عرفان رضوی کی جانب سے مہمانان خصوصی کو منصوبے کے بارے میں مفصل بریفینگ دی گئی جس میں بتایا گیا کہ یہ منصوبہ ایک سال میں مکمل کیا گیا جس پر کل لاگت ایک ارب پچیس کروڑ روپے آئی۔ یہ منصوبہ ملٹری لینڈ اینڈ کنٹونمنٹ ڈیپارٹمنٹ کی سوچ تھی جس کو راولپنڈی کینٹ بورڈ نے پایہ تکمیل تک پہنچایا۔یہ اپنی نوعیت کا پاکستان کا پہلا منصوبہ تھا۔ اس موقع پر چیف سیکرٹری پنجاب نے کہا کہ میں خصوصی طورپر اس پراجیکٹ کاافتتاح کرنے لئے آیا ہوں جس کو عوام میں بھر پور پذیرائی ملی ہے۔
انہوں نے کام کا تفصیلی جائزہ لیا اور کام کے معیار کی تعریف کی۔ چیف سیکرٹری پنجاب نے مستقبل میں پنجاب بھر کے باقی کنٹونمنٹس اور دیگر شہروں میں بھی اس طرح کے پراجیکٹ شر وع کرنے کا اعلان کیا۔ افتتاح کے موقع پر دیگر شرکت کرنے والوں نے بھی کام کے معیار اور ریکارڈ وقت میں مکمل کرنے پر راولپنڈی کینٹ بورڈ کو سراہا۔ منصوبے میں انڈر گرائونڈ کیبلنگ، روڈز کی ٹف ٹا ئلنگ، دکانات کے سٹینڈرڈ بورڈز،کشادہ فٹ پاتھ،جد ید لائٹس،خو بصورت بینچز، ایگزیکٹو واش رومز،فری شٹل سروس، واکنگ سٹریٹ اور کھانے پینے کی معیاری اشیاء کے لئے نئے فوڈ کیبنز کا قیام شامل ہیں۔
بینک روڈ صدر کے منصوبے کو عوام اور تاجر برادری کے تعاون کے ساتھ وقت پر مکمل کیا گیا مہمانان کو ایگزیکٹو واش رومز کا معائنہ کروایا گیا۔ نیز شٹل سر وس کے ذریعہ بینک روڈ کے مختلف حصوں کا دورہ کروایا گیا۔راولپنڈی کینٹ بورڈ عوام الناس کو ہرممکن سہولیات دینے کے لئے دن رات کوشاں ہے اور ان کے معیار کو مزید بہتر کرنے کے لئے مصروف عمل ہے۔ مہمانان کی جانب سے پراجیکٹ کی بروقت تکمیل اور سٹینڈرڈ کو خو ب سراہا گیا۔ عوام کی جانب سے اس طرح کے منصوبوں کو دیگرشہرو ں میں بھی شروع کرنے کی خواہش ظاہر کی گئی۔
