اسلام آباد۔31جولائی (اے پی پی):صدر مملکت ڈاکٹر عارف علوی نے چینی صدر کے خصوصی نمائندہ، چین کی کمیونسٹ پارٹی کی سنٹرل کمیٹی کے پولٹ بیورو کے رکن اور نائب وزیر اعظم ہی لی فینگ کو پاک چین دوستی اور چین پاکستان اقتصادی راہداری کے فروغ کے لئے ان کی شاندار خدمات کے اعتراف میں ہلال پاکستان ایوارڈ سے نوازا۔ چین کے نائب وزیر اعظم کو اعزاز دینے کے لئے ایک سادہ اور پرقار تقریب پیر کو ایوان صدر اسلام آباد میں ہوئی جہاں صدر مملکت ڈاکٹر عارف علوی نے انہیں ہلال پاکستان کا اعزاز عطا کیا۔
وزیراعظم محمد شہباز شریف، چیئرمین سینیٹ محمد صادق سنجرانی، سپیکر قومی اسمبلی راجہ پرویز اشرف، کابینہ کے اراکین، چیئرمین جوائنٹ چیفس آف سٹاف کمیٹی، مسلح افواج کے سربراہان، چین کے نائب وزیر اعظم ہی لی فینگ کے ہمراہ پاکستان کے دورہ پر آئے ہوئے وفد کے اراکین سمیت اعلیٰ سول و عسکری حکام نے تقریب میں شرکت کی۔ ہلال پاکستان ایوارڈ ان لوگوں کو تسلیم کرنا ہے جنہوں نے پاکستان کے قومی مفادات کے لیے شاندار خدمات سرانجام دیں۔حکومت پاکستان کی دعوت پر چینی صدر کے خصوصی نمائندہ چین کے نائب وزیراعظم ہی لی فینگ چین پاکستان اقتصادی راہداری (سی پیک)کی10ویں سالگرہ کی تقریبات میں شرکت کے لیے پاکستان کا دورہ کر رہے ہیں۔
انہوں نے چین کے بین الاقوامی اقتصادی تعلقات اور بیلٹ اینڈ روڈ انیشیٹو کے نفاذ میں نمایاں کردار ادا کیا ہے جن میں سے سی پیک ایک اہم منصوبہ ہے۔ انہوں نے نیشنل ڈویلپمنٹ اینڈ ریفارم کمیشن (2017-23) کے چیئرمین کے طور پر پاکستان میں سی پیک کے متعدد منصوبوں کی منصوبہ بندی اور ان پر عملدرآمد میں اہم کردار ادا کیا ہے۔ پاکستان کے عظیم دوست ہونے کے ناطے چین کے نائب وزیراعظم ہی لی فینگ نے توانائی کے منصوبوں پر عمل درآمد میں مدد کرنے کے علاوہ پاکستان کی صنعت کاری اور سماجی و اقتصادی ترقی کے لیے کام کیا۔
چینی نائب وزیر اعظم ہی لی فینگ کو ہلال پاکستان کا اعزاز دینے کےلئے منعقدہ تقریب میں چین کے نائب وزیر خارجہ اور پاکستان میں چینی ناظم الامور بھی شریک ہوئے ۔ اس سے قبل ایوان صدر آمد پر چین کے نائب وزیر اعظم کا انتہائی پرتپاک استقبال کیا گیا۔ چین کے نائب وزیر اعظم ہی لی فینگ پاکستان کے سرکاری دورہ پر اتوار کو اسلام آباد پہنچے تھے۔
Short Link: https://urdu.app.com.pk/urdu/?p=377039
