اسلام آباد۔21مارچ (اے پی پی):صدر مملکت آصف علی زرداری نے ڈیرہ اسماعیل خان آپریشن میں سکیورٹی فورسز کی جانب سے 10 خوارج جہنم واصل کرنے پر انہیں خراج تحسین پیش کیا ہے۔ جمعے کو یہاں ایوانِ صدر کے پریس ونگ سے جاری بیان کے مطابق صدر مملکت نے انٹیلی جنس پر مبنی کارروائی کے دوران فتنۃ الخوارج کے دہشت گردوں کا قلع قمع کرنے پر سکیورٹی فورسز کی بہادری کو سراہا۔
انہوں نے کارروائی کے دوران جامِ شہادت نوش کرنے والے کیپٹن حسنین اختر شہید کو خراجِ عقیدت کرتے ہوئے کہا کہ قوم اپنے بہادر شہداء کی قربانیوں کو ہمیشہ یاد رکھے گی۔ صدر مملکت نے کیپٹن حسنین اختر شہید کی بہادری اور جذبہ حب الوطنی کو سراہا۔
انہوں نے شہید کے لواحقین کے ساتھ اظہار ہمدردی اور ان کے لئے صبر جمیل کی دعا کی۔ صدر آصف علی زرداری نے کہا کہ دہشت گردوں کے مکمل خاتمے تک سکیورٹی فورسز کی کاروائیاں جاری رہیں گی۔ انہوں نے کہا کہ دہشت گرد عناصر کے خاتمے اور ملکی دفاع کےلئے ہمارا عزم غیر متزلزل رہے گا۔ صدر مملکت نے فتنۃ الخوارج کے مکمل خاتمے کے قومی عزم کا بھی اظہار کیا۔
Short Link: https://urdu.app.com.pk/urdu/?p=574897
