اسلام آباد۔1ستمبر (اے پی پی):صدر مملکت آصف علی زرداری نے کل جماعتی حریت کانفرنس کے بانی رہنما سید علی گیلانی کو خراج عقیدت پیش کرتے ہوئے کہا ہے کہ انہوں نے پوری زندگی حقِ خودارادیت کی جدوجہد کے لیے وقف کی،ان کی زندگی قربانی اور ثابت قدمی کی علامت ہے۔
پیرکو ایوان صدرکے پریس ونگ سے جاری بیان کے مطابق سید علی شاہ گیلانی کی چوتھی برسی پر اپنے پیغام میں صدر مملکت نے کہا کہ سید علی گیلانی کی زندگی قربانی اور ثابت قدمی کی علامت ہے،اُن کی ذات حق و انصاف پر یقین رکھنے والوں کے لئے مشعلِ راہ ہے ۔انہوں نے کہا کہ بھارتی ظلم و ستم سید علی گیلانی کے عزم اور جرأت کو متزلزل نہ کر سکا، ان کے موقف نے کشمیری عوام کو آزادی کی جدوجہد پر ثابت قدم رکھا،پاکستان سید علی گیلانی اور کشمیری عوام کی قربانیوں کو خراجِ تحسین پیش کرتا ہے۔
صدرمملکت نے کہا کہ سید علی گیلانی کا لہو تحریکِ آزادی کو ہمیشہ زندہ رکھے گا اورپاکستان کشمیری عوام کا مقدمہ ہر فورم پر اٹھاتا رہے گا،بھارتی جبر کشمیری عوام کے حوصلے پست نہیں کر سکتا۔ آصف علی زرداری نے کہا کہ کشمیری عوام کو اقوامِ متحدہ کی قراردادوں کے مطابق حقِ خودارادیت ملنا چاہیے۔ انہوں نے دعا کی کہ اللہ تعالیٰ سید علی گیلانی کے درجات بلند فرمائے۔
