اسلام آباد۔25مارچ (اے پی پی):صدر مملکت آصف علی زرداری کی جانب سے رمضان المبارک کی بابرکت ساعتوں اور خوشیوں میں یتیم بچوں کو شامل کرنے کیلئےپاکستان آرفن کیئر فورم کے زیرِ کفالت یتیم بچوں کیلئے ایوانِ صدر میں افطار ڈنر کا اہتمام کیا گیا ۔
ایوان صدر کے پریس ونگ کے مطابق صدر مملکت نے یتیم بچوں کیلئے افطار ڈنر پر اظہارِ خیال کرتے ہوئے کہاکہ بچے ہمارا مسقبل ہیں، بچے اپنی تعلیم پر خصوصی توجہ دیں۔ صدر مملکت نے تلقین کی کہ بچے محنت کریں تاکہ کامیاب انسان بن سکیں، آپ سب مجھے اپنے بچوں کی طرح عزیز ہیں۔صدر مملکت نے آرفن کیئر فورم کے زیرکفالت بچوں میں بطور تحفہ کمپیوٹر ٹیبلٹس بھی تقسیم کئے۔
خاتون اول آصفہ بھٹو زرداری کے مشورے پر آپ کو کمپیوٹر ٹیبلیٹس کا تحفہ دے رہا ہوں۔ ان کا کہنا تھا کہ تمام بچے کمپیوٹر ٹیبلیٹس کو تعلیم حاصل کرنے اور سیکھنے کیلئے استعمال کریں۔صدر مملکت نے بچوں سے ملاقات کی، شفقت کا اظہار بھی کیا۔تقریب سے پاکستان آرفن کیئر فورم کے چیئرمین ایئر مارشل (ر) فاروق حبیب نے بھی خطاب کیا۔
ان کا کہنا تھا کہ پاکستان میں ایک اندازے کے مطابق 46 لاکھ یتیم بچے ہیں، پاکستان آرفن کیئر فورم اور اس سے منسلک ادارے ملک بھر میں ایک لاکھ 20 ہزار کے قریب بچوں کی کفالت کر رہے ہیں، فورم ملک میں یتیم بچوں کے حقوق کیلئے آواز بلند کررہا ہے، یتیم اور محروم بچوں کی کفالت معاشرے کی مشترکہ ذمہ داری ہے۔چیئرمین پاکستان آرفن کیئر فورم نے یتیم بچوں کی ایوانِ صدر میں میزبانی اور حوصلہ افزائی پر صدر مملکت کا شکریہ ادا کیا۔
Short Link: https://urdu.app.com.pk/urdu/?p=576202
