اسلام آباد ۔ 28 نومبر (اے پی پی) صدر مملکت ممنون حسین نے پاک فوج کی پیشہ ورانہ صلاحیت اور تیاریوں کو سراہتے ہوئے کہا ہے کہ ملک کا دفاع محفوظ اور باصلاحیت ہاتھوں میں ہے۔ انہوں نے یہ بات چیف آف آرمی سٹاف جنرل راحیل شریف سے گفتگو کرتے ہوئے کہی جنہوں نے پیر کو ایوان صدر میں ان سے الوداعی ملاقات کی۔ صدر مملکت نے آپریشن ضرب عضب کے ذریعے انتہاءپسندی اور دہشت گردی کی لعنت کے انسداد اور ملک کے مختلف حصوں میں امن و امان کی بحالی میں جنرل راحیل شریف کی گراںقدر خدمات کو سراہا۔ صدر نے کہا کہ چیف آف آرمی سٹاف کی حیثیت سے جنرل راحیل شریف کی پیشہ ورانہ اور قائدانہ صلاحیتوں کو ہمیشہ یاد رکھا جائے گا۔
