اسلام آباد۔10مارچ (اے پی پی):سیکرٹری جنرل پیپلز پارٹی پارلیمنٹینز نیئر حسین بخاری نے کہا ہے کہ پارلیمان کے مشترکہ اجلاس سے خطاب میں صدر مملکت آصف علی زرداری نے قومی معاملات و مسائل کے حل کیلئے روڈ میپ دیا،
صدر مملکت کی تقریر معاشی و سیاسی استحکام اورقومی سلامتی کیلئے جامع لائحہ عمل پر مبنی تھی۔پیر کو صدر مملکت آصف علی زرداری کے پارلیمنٹ کے مشترکہ اجلاس سے خطاب پر ردعمل میں نیئر حسین بخاری نے کہا کہ صدر مملکت نے قومی اتحاد و یکجہتی کی خاطر اتفاق رائے پر زوردیا۔
انہوں نے کہا کہ صدر مملکت نے حکومت پر مشاورتی طرز حکمرانی اپنانے پر زور دیا،تقریر میں جمہوری اقدار، جامع ترقی، اور متوازن خارجہ پالیسی پر زور دیا گیا،صدر نے ممبران پارلیمنٹ کو تلقین کی کہ سیاسی اختلافات سے بالاتر ہو کر قومی مفادات کو ترجیح بنائیں۔انہوں نے کہا کہ سرکاری ملازمین کی تنخواہیں ،پنشن اضافہ کرنے کا اعزاز رکھنے والے صدر نے تنخواہ دار طبقے پر ٹیکس کم کرنے اورتنخواہوں میں اضافہ کرنے کا مطالبہ کیا۔
انہوں نے کہا کہ صدر مملکت نے دہشت گردی کے خاتمے کے پختہ عزم کا اعادہ کیا،صدر مملکت نے سیاسی جماعتوں کے درمیان تعاون کے فروغ کو لازمی قرار دیا ہے، مشترکہ اجلاس میں پی ٹی آئی کا غیر پارلیمانی رویہ افسوسناک ہے۔
Short Link: https://urdu.app.com.pk/urdu/?p=570888
