اسلام آباد ۔ 16 دسمبر (اے پی پی) صدر مملکت ڈاکٹر عارف علوی نے سانحہ اے پی ایس کے شہداءکے درجات کی بلندی اور اہل خانہ کے لیے صبر جمیل کی دعا کی ہے۔ اتوار کو سانحہ آرمی پبلک سکول پشاور کی چوتھی برسی کے موقع پر ایوان صدر سے جاری کئے گئے بیان کے مطابق صدر مملکت نے کہا کہ معصوم طلباءاور اساتذہ کی قربانی نے قوم کو بیدار اور متحد کیا، قوم اے پی ایس کے شہداءاور ان کے لواحقین کی قربانی ہمیشہ یاد رکھے گی۔ انہوں نے کہا کہ قوم دہشت گردی کے خلاف کامیابی سے لڑنے پر پاک فوج سمیت تمام سیکورٹی فورسز کی قربانیوں کی معترف ہے، سانحہ اے پی ایس ایک قومی المیہ کے ساتھ تجدید عہد کا بھی دن ہے۔ صدر نے کہا کہ آج کے دن قوم یہ عہد کرے کہ ملک میں انتہا پسندی کا راستہ ہمیشہ کے لیے روکنے کیلئے ہر قسم کی قربانی کیلئے تیار رہے گی۔
Short Link: https://urdu.app.com.pk/urdu/?p=126276
