گلگت ۔ یکم جولائی (اے پی پی) صدر مملکت ڈاکٹر عارف علوی نے گلگت بلتستان میں سیاحت کے فروغ اور ماحول کے تحفظ کے لئے متعارف کئے گئے اقدامات کو سراہتے ہوئے شمالی علاقوں کا رخ کرنے والے سیاحوں پر زور دیا ہے کہ وہ ان علاقوں میں قدرتی خوبصورتی کو برقرار رکھنے میں تعاون کریں، وفاقی حکومت ملک میں سیاحت کے فروغ پر خصوصی توجہ مرکوز کئے ہوئے ہے،سیکورٹی کی صورتحال بہتر ہونے کی وجہ سے سیاحوں کی آمدورفت بڑھ گئی ہے۔ وہ ہنزہ میں انٹرنیشنل سائیکل ریس ٹور ڈی خنجراب 2019ءکے دوسرے ایڈیشن کی اختتامی تقریب سے خطاب کر رہے تھے۔ گلگت بلتستان کی حکومت نے پاکستان سائیکلنگ فیڈریشن کے اشتراک سے سائیکل ریس کا اہتمام کیا جس میں اندرون و بیرون ملک سے سائیکلسٹس نے حصہ لیا۔ اس موقع پر گورنر گلگت بلتستان، چیف سیکریٹری گلگت بلتستان، سیاسی رہنماءاور سینئر سرکاری حکام بھی موجود تھے۔ صدر مملکت نے تقریب سے خطاب کرتے ہوئے سائیکلسٹس کے جذبے کو سراہا جو 18 ہزار فٹ کی بلندی پر خنجراب ٹاپ ۔ پاک چین سرحد پر پہنچے۔ انہوں نے کہا کہ یہ ایک منفرد تجربہ ہے جس میں سائیکلسٹس نے چار ہزار فٹ کی بلندی سے ریس کا آغاز کیا اور 18 ہزار فٹ کی بلندی پر مکمل کی۔
