اسلام آباد۔13ستمبر (اے پی پی):صدر مملکت ڈاکٹر عارف علوی نے کہا ہے کہ پاکستان امن، جمہوریت، انسانی حقوق، صنفی مساوات، نوجوانوں کو بااختیار بنانے اور پائیدار ترقی کیلئے بین الپارلیمانی یونین کے مشن پر قائم رہے گا، امید ہے کہ بین الپارلیمانی یونین بھارت میں جاری اسلامو فوبیا اور مسلمانوں پر بڑھتے ہوئے ظلم و ستم کا نوٹس لے گی ، ترقی یافتہ دنیا گلوبل وارمنگ سے پیدا ہونے والے بڑے سیلاب سے ہونے والی تباہی سے نمٹنے کیلئے پاکستان کی مدد کرے ۔
ان خیالات کا اظہار انہوں نے منگل کو بین الپارلیمانی یونین کے صدر دوارتے پشیگوسے وفد کے ہمراہ ملاقات کے دوران کیا۔ اس موقع پر چیئرمین سینٹ محمد صادق سنجرانی، سینیٹر فیصل سلیم رحمن اور پاکستان میں پرتگال کے سفیر پولو نیویز پوسینہو بھی موجود تھے۔
وفد سے گفتگو کرتے ہوئے صدر مملکت نے بین الپارلیمانی یونین کے مشن پر پاکستان کے قائم رہنے کے عزم کا اعادہ کیا۔ انہوں نے کہا کہ پاکستان امن، جمہوریت، انسانی حقوق، صنفی مساوات، نوجوانوں کو بااختیار بنانے اور پائیدار ترقی کیلئے بین الپارلیمانی یونین کے مشن پر قائم رہے گا، پاکستان بین الپارلیمانی یونین سے بہت زیادہ توقعات رکھتا ہے ۔ انہوں نے کہا کہ پاکستان مقبوضہ جموں و کشمیر میں انسانی حقوق برقرار رکھنے اور تنازعہ کے حل میں اہم کردار کی امید کرتا ہے ، امید ہے کہ بین الپارلیمانی یونین بھارت میں جاری اسلامو فوبیا اور مسلمانوں پر بڑھتے ہوئے ظلم و ستم کا نوٹس لے گی۔
انہوں نے کہا کہ پاکستان میں حالیہ تباہ کن سیلاب دنیا کیلئے باعثِ تشویش ہیں ، دنیا کے کئی حصوں خصوصاً پاکستان میں موسمیاتی تبدیلیوں کی وجہ سے بڑے پیمانے پر تباہی ہوئی ، ماحولیاتی تباہی کے اثرات اور کاربن کے اخراج کو کم کرنے کے لئے جنگی بنیادوں پر سنجیدہ، بامعنی اور موثر اقدامات کی ضرورت ہے ۔ انہوں نے کہا کہ افسوس کہ پاکستان کو گلوبل وارمنگ کے بدترین اثرات کا سامنا ہے ، عالمی سطح پر کاربن کے اخراج میں پاکستان کا حصہ ایک فیصد سے بھی کم ہے۔
صدر عارف علوی نے کہا کہ بین الپارلیمانی یونین ماحولیاتی تبدیلی کے منفی اثرات کم کرنے کے لئے پارلیمانی سطح پر اقدامات کرے ۔ انہوں نے کہا کہ پاکستان تنہا 3 کروڑ سے زائد سیلاب متاثرین کی بحالی ، لاکھوں گھروں اور اہم انفراسٹرکچر کی تعمیر نو کا کام نہیں کر سکتا، ترقی یافتہ دنیا گلوبل وارمنگ سے پیدا ہونے والے بڑے سیلاب سے ہونے والی تباہی سے نمٹنے کیلئے پاکستان کی مدد کرے ۔
بین الپارلیمانی یونین کے صدر دوارتے پشیگونے سیلاب کی وجہ سے اموات ، ملک کے بیشتر حصوں میں انفراسٹرکچر کی تباہی پر تشویش کا اظہار کیا۔ انہوں نے کہا کہ بین الپارلیمانی فورم ایک کثیرالجہتی فورم ہونے کے ناطے دنیا کو درپیش مسائل پر گفتگو کرتا ہے ، دنیا کا کوئی بھی ملک دوسرے ممالک کے اجتماعی تعاون کے بغیر درپیش مسائل کو حل نہیں کرسکتا۔
Short Link: https://urdu.app.com.pk/urdu/?p=327046
